त्रिनगर नाकाबाट चार महिलाको उद्धार

धनगढी, ११ साउन– कैलालीको त्रिनगर सीमा नाकाबाट भारत हुँदै कुवेत जान लागेका भनिएका चारजना महिलालाई प्रहरी र माइती नेपालको टोलीले आइतबार उद्धार गरेको छ ।

उद्धार गरिएकामा सिन्धुपाल्चोकका दुई र मकवानपुर र काभ्रेपलाञ्चोकका एक महिला रहेको जिल्ला प्रहरी कार्यालयले जनाएको छ । काठमाडौँबाट बसमा आएका यी महिलालाई एक जना दलालले त्रिनगर नाका कटाउँदै गरेको अवस्थामा शंंका लागी सोधपुछ गरेपछि उद्धार गरिएको प्रहरी उपरीक्षक राजेन्द्र विष्टले बताए ।

सीमा कटाएबापत एक दलालले प्रतिमहिला पाँच हजार लिएको बुभिएको छ । मुख्य दलाल भने दिल्लीबाट त्रिनगरपारीको गौरीफाँटा नाकामा रहेकोमा महिलाको उद्धारपछि उनी त्यहाँबाट फरार रहेको बताइएको छ । महिलालाई जिल्ला प्रहरी कार्यालयमा सोमबार सोधपुछपछि माइती नेपाल, धनगढीमा राखिएको छ । घटनाका सम्बन्धमा अनुसन्धान जारी रहेको प्रहरी उपरीक्षक विष्टले बताए ।

from Nepal123.com - त्रिनगर नाकाबाट चार महिलाको उद्धार