दीक्षितलाई तत्काल रिहा गरः अन्तर्राष्ट्रिय पत्रकार महासंघ (आईएफजे)

अन्तर्राष्ट्रिय पत्रकार महासंघ (आइएफजे) ले पत्रकार कनकमणि दीक्षितलाई नियन्त्रणमा लिने अख्तियार दुरुपयोग अनुसन्धान आयोगको कार्यको कडा शब्दमा निन्दा गरेको छ ।

आइएफजेले दीक्षितलाई तुरुन्तै रिहा गर्न समेत माग गरेको छ ।

“कनकमणि दीक्षितको गिरफ्तारीबाट नेपालमा अभिव्यक्ति स्वतन्त्रताको अवस्था बारे गम्भीर चिन्ता उत्पन्न भएको छ । दीक्षितको गिरफ्तारी शंकास्पद छ र न्यायिक प्रक्रियाप्रति प्रश्न उठेको छ,” विज्ञप्तिमा भनिएको छ ।

आइएफजेले दीक्षितलाई तत्काल रिहा गर्न माग गर्दै अख्तियारबाट भएकोे गिरफ्तारी तथा लगाएका आरोप बारे निष्पक्ष र पारदर्शी अनुसन्धान गर्न समेत माग गरेको छ ।

युद्ध अपराधविरुद्ध कडा आवाज उठाएका दीक्षितलाई सन् २००५ मा श्रीलंकामा आयोजित सम्मेलनमा जान नदिइएको, २००६ को अप्रिल महिनामा पक्राउ गरिएको समेत आइएफजेले स्मरण गरेको छ । त्यसबेला लोकमान सिंह तत्कालीन शाही सरकारका मुख्य सचिव थिए ।

दीक्षित राष्ट्रिय र अन्तर्राष्ट्रिय स्तरमा सम्मानित पत्रकार भएको भन्दै नेपाल, बांग्लादेश, बेलायत, अमेरिका, अष्ट्रेलिया र श्रीलंका लगायत देशका सम्पादक–पत्रकारले संयुक्त विज्ञप्ति समेत जारी गरेको जानकारी दिंदै आइएफजेले भनेको छ, “सम्पूर्ण दक्षिण एशियामै प्रेस स्वतन्त्रताको मुद्दा उठिरहेका बेला दीक्षितलाई पक्राउ गरिएको छ । अभिव्यक्ति स्वतन्त्रतामा विश्वास गर्ने हामी दीक्षितको तत्काल रिहाई, विना पूर्वाग्रह, स्वतन्त्र र पारदर्शी सुनुवाईको माग गर्दछौं । हामीलाई दीक्षितको अधिकार र सुरक्षाप्रति चिन्ता भएकोले उनको गिरफ्तारीको अवस्थाबारे जानकारी गराउन नेपाल सरकारसँग माग गर्दछौं ।”

अख्तियार प्रमुखमा लोकमानसिंह कार्कींको नियुक्ति हुँदा पत्रकार दीक्षितले विरोध प्रदर्शन गरेका कारण अख्तियारले प्रतिशोधको भावनाबाट प्रेरित भएर उनलाई  दुख दिएको दीक्षितले बताएको उल्लेख गरिएको  छ ।

हिमाल खबरबाट

यो समग्री नेपाल१२३.com मा पुरै पढौं