इटहरी, १५ फागुन । पूर्व प्रधानमन्त्री तथा नयाँ शक्ति नेपालका संयोजक डा. बाबुराम भट्टराईले पुरातनवादी राजनीतिक चिन्तन र सोचबाट नेपाललाई समृद्ध बनाउन असम्भव देखिएकाले आफूहरुले नयाँ शक्तिको अभियान अघि बढाएको बताएका छन् ।
सुनसरीको इटहरीमा आज आयोजित पत्रकार सम्मेलनमा नेता डा भट्टराईले देशलाई आर्थिक, साँस्कृतिक र सामाजिक रुपान्तरण गर्न हिजोको राजनीतिक चिन्तन र धारणालेमात्र सम्भव नहुने स्पष्ट पारे ।
एक फरक प्रसंगमा नेता भट्टराईले प्रचण्ड बिरामी भएको भन्दै सुस्वास्थ्यको कामनासमेत गरेका छन् । शुक्रबार भट्टराईको गृह जिल्ला पुगेका एमाओवादी अध्यक्ष तथा पूर्व सहकर्मी प्रचण्डको कडा अभिव्यक्तिबारे जवाफ दिँदै नयाँ शक्तिलाई झटारो फर्काउने फुर्सद नभएको प्रतिक्रिया दिए ।
नयाँ शक्ति नेपालका नेतृत्वकर्ता एवं पूर्व प्रधानमन्त्री डा. बाबुराम भट्टराईले आफूहरुलाई झटारो फर्काउने फुर्सद नभएको बताएका छन्। ‘कुकुरहरु भुकिराख्छन्, रोक्दै ढुंगा हान्दै हिँडियो भने आफैलाई ढिलो हुन्छ र पुगिँदैन,’ भट्टराईले भने, ‘हामीलाई झटारो फर्काउने फुर्सद छैन, फर्काउन थालियो भने ढिलो हुन्छ ।’
उनले चैत मसान्तभित्र एक लाख जनालाई संगठित गरेर पार्टी घोषणा गर्ने र १० देखि १५ वर्षभित्र नेपाललाई एउटा तहको समृद्ध राष्ट्र बनाउने उद्घोष गरे ।
उनले हिन्दू राष्ट्र र राजतन्त्रलाई बगेको खोलासँग तुलना गर्दै अब यो फर्कन असम्भव रहेको प्रतिक्रिया दिए । उनले संगठन विस्तार, कार्ययोजना निर्माण र जनसरोकारका विषयमा सामाजिक अभियान सञ्चालनलाई प्राथमिकता दिएको बताउँदै कार्यकर्ता प्रशिक्षण सुरु गरेको बताए। उनले सुनसरीकै धरानमा पहिलो पटक कार्यकर्ता भेला गरी प्रशिक्षण दिएका छन्। उनले पूर्वमा आर्थिक विकासको पर्याप्त सम्भावना रहेकोले नयाँ शक्तिको अभियान पनि पूर्वबाट सुरु गरेको बताए।
उनले राजनीतिक र सामाजिक सद्भाव सिर्जना गर्दै सम्पूर्ण नेपालीहरुलाई समान ढङ्गले नयाँ शैलीबाट देश निर्माण गर्ने अभियानमा समाहित गराउनु नयाँ शक्तिको मुख्य अभियान रहेको स्पष्टसमेत पारे ।
डा भट्टराईले देशलाई भ्रष्टाचाररहित नबनाएसम्म कुनै पनि नेपालीको आर्थिक हैसियत माथि उठ्न सम्भव छैन भन्ने आफ्नो बुझाई र विश्लेषण रहेको तर्क गर्दै नयाँ शक्तिले देशैभर अभियान चलाउने रणनीति अघि सारेको जानकारी दिए ।
यो समग्री नेपाल१२३.com मा पुरै पढौं
No comments:
Post a Comment