कांग्रेसमा खेल्दै रामवरणः छोरालाई कोषाध्यक्ष बनाउने दाऊ

१६ फागुन, काठमाडौं । गणतन्त्र नेपालका पहिलो राष्ट्रपति भएपछि डा. रामवरण यादव पार्टी राजनीतिबाट टाढिए । यद्यपि, आफ्नो मातृ पार्टी नेपाली कांग्रेसभित्र उनको चासो र प्रभाव भने बाँकी नै छ ।

कांग्रेसको १३ औं महाधिवेशनमा डा. यादवको मुख्य चासो हो, छोरा चन्द्रमोहनलाई कोषाध्यक्ष बनाउनु । सरकारले उपलब्ध गराएको ललितपुर भैसेपाटीस्थित निवासमा बसेर उनी यसैको तारतम्य मिलाइरहेका छन् ।

कांग्रेसका एक नेता भन्छन्, ‘पूर्व राष्ट्रपति जस्तो सम्मानित व्यक्ति भएकाले कांग्रेसको महाधिवेशनमा भूमिका नहुनु पर्ने हो । दुर्भाग्य भनौं, ‘रामवरण फाक्टर’ कांग्रेसमा छ ।’

चन्द्रमोहन यादव

कांग्रेसका पूर्वमहामन्त्री समेत रहेका डा. यादवले राष्ट्रपति हुँदाताका नै छोरालाई राजनीतिमा तानेका थिए । चन्द्रमोहन हाल प्रत्यक्ष निर्वाचित सांसद छन् ।

कांग्रेसको १२ औं महाधिवेशन हुँदा यादव राष्ट्रपति थिए । त्यसबेला पनि उनीमाथि शीतल निवासमा बसेर सुशील कोइरालाका लागि भोट मागेको आरोप लागेको थियो । हुन पनि कांग्रेसभित्र उनको प्रभाव अझै बलियो रहेको मानिन्छ । कांग्रेसको आन्तरिक चुनावमा मधेस फ्याक्टरले काम गर्छ र मधेसमा उनको महामन्त्री हुँदादेखि नै राम्रो प्रभाव रहँदै आएको छ ।

कांग्रेस स्रोतहरुका अनुसार यो पटक चन्द्रमोहन कोषाध्यक्षको उम्मेदवार बन्ने प्रयासमा छन् । कांग्रेस संस्थापनको उम्मेदवार बन्ने प्रयासमा रहेका कार्यबाहक सभापति रामचन्द्र पौडेलको टीमको कोषाध्यक्षमा यादवको दाबी छ ।

यादव स्वयं भने यसबारे खुलेर कुरा गर्न चाहँदैनन् । किनकी उनी अझै महाधिवेशन प्रतिनिधि भइसकेका छैनन् । उनको क्षेत्र धनुषा ५ मा सोमबार चुनाव हुँदैछ ।

क्षेत्रको चुनावको तयारीमा व्यस्त रहेका यादवले अनलाइनखबरसँग भने, ‘पहिला महाधिवेशन प्रतिनिधि हुनुपर्‍यो । त्यसपछि केन्द्रमा के हुने कुुरा गरौंला नि ।’

समर्थन रामचन्द्रलाई

यो महाधिवेसनमा पूर्वराष्ट्रपति डा. यादवको समर्थन रामचन्द्रलाई छ । यद्यपि, उनले यसमा खुलेर लविङ सुरु गरिसकेका छैनन् ।

सभापतिका उम्मेदवारमध्ये शेरबहादुर देउवासँग उनी पहिलेदेखि नै नजिक छैनन् । संविधान निर्माणका क्रममा खेलेको भूमिकाले गर्दा सिटौलासँग पनि उनी रुष्ट छन् । त्यसैले डा. यादवको समर्थन संस्थापन पक्षका उम्मेदवार रामचन्द्रलाई रहनेछ ।

यसपटक छोरालाई कोषाध्यक्षको बनाउन उनले रामचन्द्रसँग ‘नेगोसिएसन’ गरिरहेका छन् । रामचन्द्र सहमत भए खुलेर साथ दिने विश्वास दिलाएको स्रोतको दावी छ ।

यो समग्री नेपाल१२३.com मा पुरै पढौं