लुम्बिनी वरिपरिका उद्योग सारिने

फाल्गुन १६, २०७२- अर्थमन्त्री विष्णु पौडेलले अन्तर्राष्ट्रिय गन्तव्यस्थलको रूपमा रहेको लुम्बिनी जाने सडक क्षेत्रमा सञ्चालित उद्योगहरूलाई व्यवस्थित रूपमा स्थानान्तरण गर्नुपर्ने आवश्यकता औंल्याएका छन् । यसका लागि आवश्यक पर्ने व्यवस्थित औद्योगिक क्षेत्र स्थापना गर्ने पहल भइरहेको उनले बताए ।

सिद्धार्थनगर उद्योग वाणिज्य संघको ५७ औं वार्षिक साधारणसभाको शनिबार उद्घाटन गर्दै पौडेलले मुलुकभरि सञ्चालित उद्योग र थप उद्योगका लागि कम्तीमा पनि १ हजार बिघा जमिन क्षेत्रफल रहने गरी ७ वटा व्यवस्थित औद्योगिक क्षेत्र स्थापना गर्ने प्रस्ताव अघि बढाइएको बताए । ती औद्योगिक क्षेत्रमध्ये एउटा रुपन्देहीमा आवश्यक भएको समेत उनले बताए ।

रुपन्देहीमा व्यवस्थित खालको औद्योगिक क्षेत्र स्थापनाका लागि मोतीपुर क्षेत्रको संभाव्यता अध्ययन गरिएको उनले जनाए । ‘एकातिर लुम्बिनी जाने सडक साँघुरो भएकाले छ लेनको हुनुपर्छ भन्ने माग आउन थालेको छ भने अर्कोतर्फ सडकमा अव्यवस्थित उद्योग पनि हुनु भएन,’ उनले भने, ‘लुम्बिनी सडकमा रहेका उद्योगलाई क्रमश: व्यवस्थित औद्योगिक क्षेत्रमा स्थानान्तरण गर्नुपर्छ ।’

प्रर्याप्त क्षेत्रफलमा व्यवस्थित औद्योगिक क्षेत्र बनाइएमा एकै स्थानमा उद्योगी व्यवसायीलाई चाहिने सबै भौतिक पूर्वाधार र औद्योगिक सुरक्षा प्रदान गर्न सहज हुने पौडेलले बताए । लुम्बिनी अन्तर्राष्ट्रिय स्थल र लुम्बिनीका कारण मुलुककै हुने सम्भावित समृद्धिलाई ध्यानमा राख्दै भैरहवा–लुम्बिनी सडक मात्रै नभएर लुम्बिनी–तिलौराकोट र लुम्बिनी–रामग्रामसम्मको सडक छ लेनको विस्तार गरिनु उनले बताए ।

लुम्बिनीको योजनाबद्ध विकासका लागि जापानी वास्तुकलाविद् स्व.केन्जोटाँगेले तयार पारेको लुम्बिनी गुरुयोजना अनुरूप सम्पन्न गर्न बाँकीका काम २ वर्षभित्रमा सम्पन्न गर्ने गरी ६ महिनाभित्र अन्तर्राष्ट्रिय स्तरमा बोलपत्र आह्वान गर्ने र लुम्बिनीको महत्त्वसँग जोडिएका तिलौराकोट, रामग्राम, देवदहलगायतको स्थललाई समेट्ने गरी बृहत्तर योजनाको डिजाइन तयार पार्न योजनाकारहरूलाई आह्वान गरी समयावधि तोकेर योजना सम्पन्न गर्नुपर्नेमा आफ्नो जोड रहेको उनले सुनाए ।

लुम्बिनीको योजनाबद्ध विकासका लागि लाग्ने लागतको अध्ययन गरी गुणस्तरीय काम गर्ने गरी प्रस्ताव ल्याउन आफूले पर्यटन मन्त्रालयलगायत लुम्बिनी विकास कोषलाई भनिसकेको र यदि आफूले भनेअनुरूपको प्रस्ताव ल्याउन नसके अ–आफ्नो पदबाट छाडिदनसमेत भनेको उनले उल्लेख गरे ।

भैरहवामा निर्माणाधीन गौतम बुद्ध विमानस्थललाई पूर्ण क्षमताको अन्तर्राष्ट्रिय विमानस्थल बनाउन लुम्बिनी जाने सडकसँग जोडिने गरी थप १ सय ४० बिघा जमिन अधिग्रहणको काम सरकारले अगाडि बढाउन लागेको उनले जनाए । ‘यो अन्तर्राष्ट्रिय विमानस्थल समयमै सम्पन्न हुनुपर्छ र समयावधि थप्दै लग्ने र गुणस्तरहीनका निर्माण कार्यप्रति सरकारले कुनै सम्झौता गर्दैन र निगरानी गरिरहनेछ,’ पौडेलले भने, ‘यो विमानस्थललगायत अन्य ठूला र राष्ट्रिय गौरवका योजनाको गुणस्तरबारे तपाईं निजी क्षेत्र र नागरिक समाजले सरोकार राखिदिनुस् ।’ यस्ता योजनाको गुणस्तरको बारेमा निजी क्षेत्र र नागरिक समाजले मिडियालाई देखाइदिएमा सरकारको निगरानी हुने उनले बताए ।

सञ्चालनमा आउने तयारीमा रहेको भैरहवामा निर्मित विशेष आर्थिक क्षेत्रमा उद्योग स्थापना गर्नका लागि भाडा दर महँगो भन्ने उद्योगीको भनाइप्रति सरकारको ध्यान गएको र यसमा छलफल गर्न तयार रहेको उनले बताए । ‘भैरहवामा निर्मित विशेष आर्थिक क्षेत्र शीघ्र सञ्चालनका लागि कानुन बनेको छ र चाँडै नै लागू पनि हुँदैछ,’ पौडेलले भने, ‘तर यो विशेष आर्थिक क्षेत्र साँघुरो भएकाले विस्तार गर्न जरुरी छ ।’

 

यो समग्री नेपाल१२३.com मा पुरै पढौं