सरकारको स्वीकृति विना भूकम्प प्रभावितले घर बनाउन नपाउने

१५ फागुन, काठमाडौं । सरकारले तत्कालका लागि भूकम्प्रभावितलाई पूर्व स्वीकृति बिना आवासीय घर बनाउन रोक लगाएको छ । राष्ट्रिय पुनर्निर्माण प्राधिकरणले एक सूचना जारी गर्दै तत्कालका लागि व्यक्तिगत घर बनाउन रोक लगाइएको जनाएको छ ।

प्राधिकरणले व्यक्तिगत घरको पुनर्निर्माण गर्न सरकारी अनुदान दिने हतारमा घर नबनाउन भूकम्प्रभावितलाई आग्रह गरेको हो । अब बन्ने घर सुरक्षित एवम् भूकम्प प्रतिरोधी हुनुपर्ने भएकाले सरकारको प्राविधिक सहयोग र समन्वयमा निर्माण गर्न सरकारले तत्काल व्यक्तिगत आवासीय भवन बनाउन प्रतिबन्ध नै लगाएको हो ।

रकम नबाँड्न संघसंस्थालाई निर्देशन

यस्तै पुनर्निर्माण प्राधकिरणले विभिन्न संघसंस्था प्रभावितका लागि जथाभावी सहयोग रकम वितरण नगर्न भनेको छ । सूचनामा स्वीकृति बिना घर बनाउनु र रकम वितरण गर्नु गैरकानूनी हुने भन्दै त्यस्तो कार्य रोक्न आग्रह गरिएको छ ।

‘पुनर्निर्माण र पुनस्र्थापनाको कार्यमा गैरसरकारी संस्थाको सहयोग परिचालन गर्ने सम्बन्धी छुट्टै कार्यविधि पनि प्राधिकरणले तयार गरिरहेको छ’ सूचनामा भनिएको छ, ‘प्राधिकरणको पूर्व स्वीकृति बिना व्यक्तिगत घर निर्माण र रकम वितरण गर्नु प्रचलित कानून र नीति विपरित हुने भएकाले रोकेर प्राधिकरणमा सम्पर्क गर्न आग्रह गरिन्छ ।’

आवासीय भवन निर्माणमा प्राधिकरणसाग समन्वय नभएकाले एघर निर्माणमा एकरुपता र गुणस्तरीयता नआएको ठहर गर्दै प्राधिकरणले यस्तो निर्देशन जारी गरेको हो ।

भवनहरुको प्राविधिक पक्षलाई सुनिश्चित गर्न यस्तो सूचना निकालेको प्राधिकरणका प्रवक्ता सुरेश अधिकारीले बताए ।’हामीले गैरसरकारी संस्थाको संलग्नतालाई व्यवस्थित गर्न खोजेका हौं । सधैलाई रोक लगाउने प्राधिकरणको मनसाय होइन’ उनले भने ।

केही जिल्लामा अहिले विभिन्न संघसंस्थाहरुले व्यक्तिगत घर निर्माण गर्न रकम वितरण गरिरहेका छन् । यसैगरी पुनर्निर्माण प्राधिकरणले नीतिगत व्यवस्था गरी पुनर्निर्माण तथा पुनस्र्थापनाको काम अघि बढाउन लागेको जनाएको छ ।

यो समग्री नेपाल१२३.com मा पुरै पढौं