अवकाश पाएका पुनरावेदनका अतिरिक्त न्यायाधीश उच्च अदालतमा योग्य !

१७ भदौ, काठमाडौं । पुनरावेदन अदालतको अतिरिक्त न्यायाधीशबाट अवकाश पाएकाहरु उच्च अदालतको न्यायाधीशका लागि योग्य हुने भएका छन् ।

संसदीय समितिले अतिरिक्त न्यायाधीशबाट अवकाश पाएकाहरुको नाम उच्च अदालतको न्यायाधीशमा नियुक्तिका लागि तयार पारिने रोष्टरमा समावेश गर्ने गरी न्याय परिषद्को काम, कर्तव्य र अधिकार सम्बन्धी कानूनलाई संशोधन र एकीकरण गर्न बनेको विधेयक परिमार्जनसहित पारित गरेको छ ।

विधायन समितिको शुक्रबार सिंहदरबारमा बसेको बैठकले विधयेकमाथि परेका संशोधनहरुलाई समावेश गरेर रामनारायण बिडारी संयोजक रहेको उपसमितिले तयार पारेको प्रतिवेदन परिमार्जनसहित पारित गरेको छ ।

समितिले पारित गरेको प्रतिवेदन अनुसार न्याय परिषद्ले उच्च अदालतमा नियुुक्त गरिने न्यायाधीशहरुको रोष्टर तयार पार्दा अवकाशप्राप्त अतिरिक्त न्यायाधीशहरुको नाम पनि समावेश गर्नुपर्ने छ ।

पारित विधेयकमा न्याय परिषद्ले न्यायाधीशको पद्मा नियुक्त हुन योग्यता पुगेका नेपाली नागरिकहरुको अभिलेख तयार पार्ने व्यवस्था छ । विधायन समितिले जिल्ला न्यायाधीश संविधान बमोजिम समानुपातिक र समावेशी सिद्धान्तका आधारमा नियुक्त गर्ने गरी विधेयक पारित गरेको छ ।

समितिबाट पारित विधेयकले संसद्बाट पारित भएपछि कानूनी रुप लिने छ । समितिले न्याय प्रशासन सम्बन्धी कानूनलाई संशोधन र एकीकरण गर्न बनेको विधेयक सम्बन्धी प्रतिवेदन पनि पारित गरेको छ । यी दुवै विधेयक अघिल्लो सरकारले ल्याएको हो ।

from Nepal123.com - अवकाश पाएका पुनरावेदनका अतिरिक्त न्यायाधीश उच्च अदालतमा योग्य !