काठमाण्डु–हेटौंडा जोड्जे छोटो दूरीको सडक बिस्तारमा तीव्रता

हेटौडा, १७ भदौ- हेटौँडा–काठमाण्डु जोड्ने छोटो दूरीको वैकल्पिक मार्ग बिस्तार कार्यले फेरी तीव्रता पाएको छ ।

नाकाबन्दीपछि सुस्त बनेको ९० किलोमिटर लामो सडकचौँडा बढाउने कार्यलाई कान्तिलोकपथ सडक आयोजनाले फेरी तीव्रता दिएको हो ।

सडक आयोजना प्रमुख दीपक केसीकाअनुसार तराई आन्दोलन र नाकाबन्दीले गर्दा इन्धनको चरम अभावले काम ठप्पै बनाएकामा केही हप्तायता ठेकेदारले कामलाई तीव्रता दिएको जानकारी दिए ।
आयोजनाले चालु आर्थिक वर्षभित्र सडकलाई चौडा गरिसक्ने र आउने आर्थिक वर्षदेखि कालोपत्रे गर्ने लक्ष्य छ । आयोजनाले ठेकेदार कम्पनीलाई सडक चौडा गर्न पुस मसान्तसम्मको समय दिएपनि इन्धन अभावले निर्धारित समयमा काम हुन नसक्ने देखिएकाले असार मसान्तसम्मको लागि म्याद थप भएको थियो ।
तर असारसम्म चौडागर्ने काम नसकिएपछि फेरि म्याद थप गरेर काम सकाउने योजना अघि सारिएको हो ।

सडक चौडा गर्ने काममा अझै एकवर्ष लाग्नसक्ने देखिएको छ । हेटाँैडा र काठमाण्डुबाट साना तथा ठूला सवारीका साधन सजिलैसँग ओहोरदोहोर गर्नका लागि यो मार्गले निकै सहयोग पुग्ने स्थानीयवासी बताउँछन् ।

हेटौँडाको बुद्धचोकदेखि ललितपुरको सातदोबाटो र चापागाउँ दोबाटो सम्म ९० किलोमिटर लम्बाइ रहेको सडकको चौडाइ तीनदेखि पाँच मिटर रहेकाले त्यसलाई ८।३० मिटर चौडा गर्न लागिएको आयोजनाका प्रमुख केसीले बताए ।

विभिन्न खण्ड गरी सडक चौडाका लागि हेटौँडाको बुद्धचोकदेखि ललितपुरको टिकाभैरव पुलसम्म ७९ किलोमिटर कन्टेक प्रालि, एससिसि मोतिदान जेबी, महालक्ष्मी सिं एण्ड ब्रदर्स जेबी, कञ्चनजङ्गा गोल्डेन ग्रुप र हनुमान कन्स्ट्रक्सनले ठेक्का पाएको छ ।
हेटौँडाको बुद्धचोकदेखि ललितपुरको सातदोबाटो चाँपागाउँ दोबाटोसम्म ९० किमीमध्ये हेटौँडादेखि टिकाभैरवको पुलसम्म ७९ किमी सडक योजनाले हेर्ने र बाँकी टिकाभैरवको पुलदेखि सातदोबाटो चाँपागाउँ दोबाटोसम्म ११ किमी भने ललितपुर सडक डिभिजन कार्यालयले हेर्ने आयोजना प्रमुख केसीले बताए ।

सडक डिभिजन कार्यालयले हेटौँडाको बुद्धचोकदेखि चुच्चे खोला, चुच्चे खोलादेखि जितपुर र टिकाभैरवदेखि तिनपानेसम्मको सडक खण्डको कालोपत्रे स्तरोन्नतिका लागि यसअघि नै बोलपत्र आह्वानसमेत गरिसकेको छ ।
जग्गा अधिग्रहण गर्न र अधिकांश स्थानमा सडक छेउमा घर टहरा बनिसकेको तथा अतिक्रमित संरचना हटाउनुपर्ने चुनौती आयोजनालाई छ । यस सडकलाई दक्षिणकाली–सिस्नेरी सडकखण्ड, त्रिभुवन लोकपथको विकल्पको रुपमा हेरिएको छ ।

गत वर्षको विनाशकारी भूकम्पका कारण आएको पहिरोले अन्य लोकमार्गलाई अवरोध गरेपछि यस मार्गलाई वैकल्पिक मार्गको रुपमा स्थापित गराउन राज्यले चासो बढेको हो ।
प्रत्येक आर्थिक वर्षमा पाँचरपाँच करोड विनियोजन भएकामा चालु आर्थिक वर्षका लागि ३९ करोड विनियोजन भएको छ । यसअघि सो योजनामा झन्डै ४७ करोड खर्च भइसकेको छ ।

विंसं।२०१३मा राजा महेन्द्रले शिलान्यास गरेपछि यो ‘राजपथ’ निर्माण सुरू गरिएको थियो । काठमाण्डु– हेटैँडा वैकल्पिक सडकको योजनाका रूपमा २०६५ सालमा सरकारले तत्कालीन कान्ति राजपथलाई ‘लोकमार्ग’ नाम दिइ छुट्टै योजनाका रूपमा कामअघि बढाएको हो । रासस

from Nepal123.com - काठमाण्डु–हेटौंडा जोड्जे छोटो दूरीको सडक बिस्तारमा तीव्रता