कम्युनिस्टले बुर्जुवा शिक्षा पढ्नु हुँदैन भन्ने मान्यता गलत – नेता नेपाल

काठमाडौँ, १५ चैत । शिक्षाविद् प्रा डा विद्यानाथ कोइरालाले लेख्नुभएको ‘शिक्षामा सोचान्तरण’ र यादव आचार्यले ‘जनवादी शिक्षा’ नामक कृति आइतबारदेखि बजारमा आएको छ ।

कोइरालाको पुस्तकमा प्रशासन र संरचना मिलनबिन्दुको खोजी, प्राथमिकता नदिँदा शिक्षामा अन्योल, उच्च शिक्षाको पुनः व्यवस्थापन, पढाउने तरिका बदल्ने कि ? शान्तिको विविध पाटो, साम्यवादी सोंचमा रुपान्तरणको शिक्षालगायत ७७ वटा विषय समावेश गरिएको छ ।

त्यस्तै आचार्यको कृतिमा जनवादी शिक्षाको सैद्धान्तिक बुझाइ तथा दार्शनिक आधार, कम्युनिस्ट सत्ता भएका देशको शिक्षा प्रणाली, जनवादी शिक्षाबारे कम्युनिस्ट नेताको बुझाइलगायत विषय समावेश गरिएको छ ।

माइलस्टोन प्रकाशन तथा प्रसारण लिमिटेडद्वारा आइतबार काठमाडौंमा आयोजित कार्यक्रममा पूर्वप्रधानमन्त्री माधवकुमार नेपालले जनताको जीवनयापनका लागि प्राविधिक तथा व्यावसायिक शिक्षाको महत्व रहेको बताउँदै त्यसले उनीहरुलाई आम्दानी र उत्पादनसँग जोडेर सामाजिक रुपान्तरण गर्ने विश्वास व्यक्त गरे ।

उनले भने– ‘हामीमा नेपालीपनको भावना घट्दै गएको छ, परिवर्तनका वाहक भनिएका कम्युनिस्टबाट यस्तो खतरा देखापरेको छ ।’ विगतमा कम्युनिस्टले बुर्जुवा शिक्षा पढ्नु हुँदैन भन्ने मान्यता गलत बुझाइ रहेकामा प्रष्ट पार्दै उनले समाजप्रतिको जिम्मेवारी र राष्ट्रिय भावना जागृत गराउने शिक्षाको खाँचो औँल्याए ।

नेकपा एमालेका सचिव योगेश भट्टराईले अबको शिक्षाले विद्यार्थीलाई व्यावसायिक बनाउनुपर्नेमा जोड दिँदै जनवादी शिक्षाले मानिसलाई आलोचनात्मक चेतना दिन सक्नुपर्ने विचार व्यक्त गरे।

प्रा डा लेखनाथ शर्मा, नेकपा एमालेका नेता खिमलाल भट्टराईले दुवै पुस्तकले अबको शिक्षामा समयानुसार सुधार गरी वैज्ञानिक बनाउनुपर्ने र सबैको पहुँच पुर्याउनुपर्ने सन्देश दिएको बताए । लेखक कोइराला र आचार्यले प्राविधिक शिक्षाको विकास गरी उत्पादन, श्रमसँग जोड्नुपर्ने विचार राखे ।

कार्यक्रम आयोजक संस्थाका अध्यक्ष एवम् साहित्यकार रामप्रसाद प्रदीपले आध्यात्मिक, साहित्य तथा राजनीतिक दर्शनलगायतका पुस्तकको प्रवर्द्धन गर्ने उद्देश्यले पुस्तक प्रकाशन गरिएको जानकारी दिए । रासस

यो समग्री नेपाल१२३.com मा पुरै पढौं