चीनबाट फर्केर जेपी गुप्ताले भने- मधेसबारे कुरै भएन

१५ चैत, काठमाडौं । प्रधानमन्त्री केपी शर्मा ओली चीन भ्रमणमा रहेकै बेला तराई मधेस राष्ट्रिय अभियानका संयोजक जेपी गुप्ता पनि बेइजिङमै घुमिरहेका थिए ।

तर, गुप्ताको चीन भ्रमणमा न त मधेसको कुरा भयो, न मधेस आन्दोलनका बारेमा नै कसैले चर्चा गर्‍यो । बरिष्ठ पत्रकार युवराज घिमिरे, किशोर श्रेष्ठ, विष्णु रिजाल लगायतको टोलीमै मिसिएका थिए जेपी गुप्ता । र, यो टोलीमा विप्लव माओवादीका अनिल शर्मा विरही पनि थिए ।

मधेसी नेता गुप्ता ‘चाइना फाउण्डेसन फर पिस एण्ड डेभलपमेन्ट’ को निम्तोमा चीन गएको टोलीमा थिए । उनको टोलीमा विप्लव माओवादीका नेता अनिल विरही र एमालेका देवराज घिमिरेदेखिका पत्रकारहरु पनि थिए । तर, यो टोलीमा रहेका नेताहरुलाई कुनै पार्टीको नेता भन्दा पनि विश्लेषकको नाम दिएर टोलीमा राखिएको थियो ।

गुप्ताका अनुसार भ्रमणका क्रममा चिनियाँ अर्थशास्त्रीले चिनियाँ कृषिनीति र एक बुद्धिजिवीले चीनको जातीय पोलिसीबारे एक-एक घण्टा प्रवचन दिए । सिचुवान युनिभर्सिटीको साउथ एसिया अध्ययन केन्द्रमा उनीहरुवीच छलफल भएको थियो ।

गुप्ताले भने, ‘त्यस्तो कुनै राजनीतिक भेटवार्ताहरु थिएन र मसँग कुनै वान टु वान भेट थिएन । त्यसैले यो भ्रमणमा मधेस र मधेसमा भइरहेको आन्दोलनबारे कुनै चर्चा र छलफल भएन ।’

आफ्नो भ्रमणको निष्कर्ष सुनाउँदै तमरा अभियानका संयोजक एवं पूर्वमन्त्री गुप्ताले अनलाइनखबरसँग भने, ‘नेपालमा अहिले भारत त कहिले चिनियाँ कार्ड प्रयोग हुन्छ । तर, चीनले नेपाल र भारतको विशेष सम्वन्धलाई स्वीकार गरेको छ र उसले नेपाल चीन मात्र होइन नेपाल, चीन र भारतलाई संगै राखेर हेरेको मैले पाएँ ।’

चीनले भारत रिसाउँछ भनेर नभई आर्थिक लाभ कम हुने भएकाले नेपाल र चीन मात्र मिलेर नहुने भनेको उनको बुझाइ छ । उनले अघि भने, ‘चीनले नेपालबारे जे कुरा गर्दा पनि नजर भने भारततिर लगाएको देखिन्छ ।’

साथै दक्षिण एशियामा शान्ति कायम होस् र राजनीति भन्दा आर्थिक विकासको एजेण्डालाई प्राथमिकता दिएको आफूले पाएको तमरा अभियानका नेता गुप्ताले बताए ।

मधेसबारे चिनियाँहरुसँग कुरा भएन भन्ने प्रश्नमा गुप्ताले भने, ‘त्यस्तो कुनै राजनीतिक भेटवार्ताहरु थिएन र मसँग कुनै वान टु वान भेट थिएन । त्यसैले यो भ्रमणमा मधेस र मधेसमा भइरहेको आन्दोलनबारे कुनै चर्चा र छलफल भएन ।’

आफू चीनतिर उडेपछि मधेसी मोर्चाले चिनियाँ राजदूतलाई भेटेर ज्ञापन पत्र बुझाएको आफूले पनि थाहा पाएको भन्दै गुप्ताले भने, ‘नेपालमा संविधान आउनु र नआउनुले नेपालबारे हाम्रो धारणामा कुनै फरक पर्दैन । तर, संविधान आएपछि पोलिटिकल कोर्स लिन्छ र आर्थिक विकासका एजेण्डा अघि बढ्छ भन्ने चिनियाँ धारणा पाएँ ।’

यो समग्री नेपाल१२३.com मा पुरै पढौं