राष्ट्रपतिलाई भेटेर प्रधानमन्त्रीले भने- बुवा आमा हजुर नै !

विहीबारको भेटमा राष्ट्रपति विद्या भण्डारी र प्रधानमन्त्री प्रचण्ड । तस्वीर: प्रधानमन्त्रीको सचिवालय

१६ भदौ, काठमाडौं । संविधानतः राष्ट्रपति मुलुकको सर्बोच्च व्यक्ति हुन् । आलंकारिक राष्ट्रपति जनताका अभिभावक हुन् ।

जनताका अभिभावक मेरा पनि अभिभावक भन्दै मुलुकका कार्यकारी प्रमुख प्रधानमन्त्री प्रचण्डले कुशे औंशीको विहानै शीतल निवास पुगेर राष्ट्रपति विद्यादेवी भण्डारीका मुख हेरेका छन् ।

केही वर्षअघिमात्र पिता गुमाएका र आमा धेरै वर्षअघि नै गुमाएका प्रचण्ड र राष्ट्रपति भण्डारीबीचको विहीवारको भेट एक प्रकारले अनौपचारिक र भावनात्मक खालको रहेको स्रोतले जनाएको छ ।

राष्ट्रपति र प्रधानमन्त्रीबीच भेट हुनु सामान्य विषय हो । दैनिक कामकाज र महत्वपूर्ण घटनाक्रमका बारेमा प्रधानमन्त्रीले राष्ट्रपतिलाई जानकारी दिने प्रचलन छ ।

तर, बिहीबार बिहान राष्ट्रपति भण्डारी र प्रधानमन्त्री प्रचण्डबीच भएको वार्तालाप भने अलि फरक थियो । प्रचण्ड बालुवाटारबाट बिहानै शितल निवास पुगेपछि सन्चो-बिसन्चोको अवस्था सोधेर सामान्य औपचारिकता पूरा भयो ।

भेटका प्रत्यक्षदर्शीका अनुसार त्यसपछि प्रचण्डले हाँस्दै भने- आज कुशे औंसीको दिन म यता आएँ । किनकी यो राष्ट्रको अभिभावक हजुर हो । बुवा-आमा पनि हजुर नै हो ।

मनमा धेरै कुरा राख्न नसक्ने र फ्याट्टै बोलिहाल्ने प्रचण्डको स्वभाव बिहीबार राष्ट्रपति भण्डारी समक्ष पनि लुक्न सकेन । प्रचण्डले आफूलाई आमा पनि हजुर, बुबा पनि हजुर भन्नु राष्ट्रपतिका लागि सायद अनपेक्षित थियो ।

प्रधानमन्त्रीले दिएको सम्मान र आदरलाई रष्ट्रपति भण्डारीले मुसुक्क हाँसेर स्वागत गरेको एक सहयोगीले बताए ।

राष्ट्रपति भण्डारी र प्रधानमन्त्री प्रचण्डबीच बिहीबारको मन्त्रिपरिषद बैठक, आसन्न भारत भ्रमणलगायतका विषयमा कुराकानी भएको थियो ।

पहिलो प्रधानमन्त्री कालमा राष्ट्रपतिको एउटै पत्रका कारण राजिनामा दिनु परेको तितो अनुभव संगालेका प्रचण्डले यसपटक बिगतका कमजोरी नदोहोर्‍याउने प्रतिबद्धता भिन्न सन्दर्भमा पटक-पटक व्यक्त गर्दै आएका छन् ।

संयोग के पनि मान्नुपर्छ भने विद्या भण्डारीलाई राष्ट्रपतिका रुपमा अघि सार्न एमालेलाई साथ दिने र चुनाव जिताउनेसम्मका घटनाक्रममा प्रचण्ड निर्णायक बनेका थिए ।

कांग्रेस सहमतिबाट बाहिर गएपछि ‘पावर शेयरिङ’मा एमालेले प्रधानमन्त्री पाउँदा माओवादीले राष्ट्रपति पाउने अवस्थामा विद्या भण्डारीलाई राष्ट्रपति बनाउन प्रचण्डले भूमिका खेलेको दावी उनी निकटस्थहरुको छ ।

from Nepal123.com - राष्ट्रपतिलाई भेटेर प्रधानमन्त्रीले भने- बुवा आमा हजुर नै !