डाक्टरले गरे विरामीलाई दुर्व्यवहार, कुरुवालाई झपड !

१६ भदौ, सप्तरी । अस्पताल मन्दिर मानिन्छ । यहाँ काम गर्ने चिकित्सकलाई भगवानको दर्जा दिइन्छ । उपचार गराउन आउने बिरामीले यहाँ प्रतिफल खोज्छन् र चिकित्सक तथा स्वास्थ्यकर्मीलाई दिनुपर्छ ।

तर, सप्तरीको एक मात्र सरकारी अस्पताल गजेन्द्रनारायण सिंह सगरमाथा अंचल अस्पतालका चिकित्सकले उपचार गराउन आएका बिरामी र उनका आफन्तलाई दुर्व्यवहार मात्र होइन् कुटपिट समेत गरेका छन् । यद्यपि अरोेपितले आरोप स्वीकार गरेका छैनन् ।

अस्पतालमा बारम्बार चर्चामा आइरहने चिकित्सक डा. दीपा यादवले एक जना बिरामीका कुरुवालाई थप्पड हान्ने र प्रसुती गराउन आएका महिला र उनको परिवारजनसँग दुव्र्यबहार गरेकी छन् । उनले गरेको दुव्र्यबहारको बिषयमा पीडितहरुले बिहीबार पत्रकारहरुलाई जानकारी गराएका छन् ।

‘दरभंगामा देखाइस्, पटना गएर बच्चा जन्मा’

डा. यादवले सप्तरीको झुटकी गाविसबाट प्रसुती गराउन आएकी एक महिलालाई प्रसुती गराउन मानिन् । झुटकी ७ कजरा टोलकी रुक्मिणी यादव बुधबार बिहान ८ बजे अस्पतालमा भर्ना भइन् । ‘सोही दिन ड्युटिमा आएकी डा. यादवले यसअघि कहाँ जँचाएको सोध्नुभयो’ रुक्मिणीका पति सन्तोषले भने, ‘आफूले भारतको दरभंगामा जँचाएको भन्नेबित्तिकै उनले बच्चा जन्माउन यहाँ किन आइस् त पटनातिर जा भन्नुभयो ।’

सन्तोषले शुरुमा डा. यादवकै क्लिनिकमा जँचाएको तर ठीक नभएपछि भारतको दरभंगा गएर जँचाएको बताए । उनका अनुसार शुरुमा रुक्मिणीलाई बच्चा नै रहँदैन्थ्यो ।

दरभंंगा जँचाएपछि बच्चा पल्न थालेको र प्रसुती गराउन उनी पत्नीलाई यहाँ ल्याएका रहेछन् । ‘यो त सबैको अस्पताल हो, यहाँ किन नल्याउने ?’ सन्तोषले प्रतिप्रश्न गरेपछि डा. दीपाले जहाँ जँचाउने हो, त्यहीं प्रसुति गराउनु भनेर प्रतिकृया दिएको सन्तोषको भनाइ छ ।

बच्चा आधा निस्किसकेपछि अप्रेशनको कुरा

सन्तोषले शुरुमा डा. दीपा यादवले यस्तो बताएपनि बिहीबार बिहान श्रीमतिलाई व्यथाले च्याप्न थाल्दा आफूहरु त्रसित भएको बताए । ‘व्यथा बढ्दै जाँदा श्रीमति काम्न थालिसकेकी थिइन्’ सन्तोषले भने, “यसपछि अस्पतालमा रहेका सिस्टरहरुले डाक्टरलाई बोलाउन भनिन् । यसपछि खोज्दै बाहिर निस्के । डा. यादव मोवाइलमा कुरा गर्दै अस्पतालतिरै आइरहनुभएको थियो ।”

यसपछि डा. यादवलाई भन्दा आउन नमानेको र आफूले यदी आउनुभएन् भने ठीक हुँदैन् भनेपछि उहाँ आफ्नो श्रीमतितिर आएको सन्तोषले बताए । डा. दीपा आउँदा बच्चा आधा निस्किसकेको र त्यसबीचमा डा. यादवले सहयोग गर्नुको सट्टा ‘यसलाई माथि लग अप्रेशन गर्नुपर्छ’ भन्न थालेको सन्तोषको भनाई छ । तर एकछिनमै बच्चा पूर्ण रुपमा जन्मेको सन्तोषले सुनाए ।

कुरुवालाई झापड

डा. यादवले भारतबाट उपचार गराउन आएका एक बिरामीका कुरुवालाई बुधबार नै झापड प्रहार गरेकी छन् ।
भारतको बिहार राज्य अन्तर्गत छातापुरबाट उपचार गराउन आएकी गुलेसा खातुनको कुरुवालाई उनले झापड प्रहार गरेकी हुन् । ‘के गर्नु भनेर सोध्न मात्रै गएकी थिएँ’ गुलेसाकी जेठानी बसेरुबले भनिन्, “गालामा एक चड्कन लगाइदिनुभयो ।”

डा. दीपा भन्छिन्, सबै आरोप गलत

डा. दीपा यादवले आफूमाथि लगाइएको सम्पूर्ण आरोप .गलत भएको बताएकी छन् । आफूले कसैलाई कुनै किसिमको दुव्र्यबहार नगरेको बताउँदै उनले आफूबिरुद्व षडयन्त्र भएको बताइन् ।

यद्यपी अस्पतालका निमित्त मेडिकल सुपरिटेन्डेन्ट डा. दिलिप साहले आफूलाई यसबारे कुनै जानकारी नभएको बताए । ‘डा. यादवले यदी यस्तो गरेको छ भने गर्न पाउँदैन्’ उनले भने, “आफू यसबारेमा अनुसन्धान गर्दैछु ।”

from Nepal123.com - डाक्टरले गरे विरामीलाई दुर्व्यवहार, कुरुवालाई झपड !