सिरक डसना उद्योगमा आगलागी

तनहुँ, २८ चैत । जिल्लाको शुक्लागण्डकी नगरपालिका वडा नं ४ गल्छिनास्थित पोषराज सिग्देलको घरमा व्यवसाय गर्दै आएका छाङ गाविस वडा नं ५ वस्ने ईश्वर मल्लको मल्ल डसना उद्योगमा गएराति आगलागी हुँदा करिब रु १६ लाख बराबरको क्षति भएको छ ।

चारवटा कोठामा राखिएका सिरक डसनामध्ये दुई कोठामा रहेका सिरक डसना जलेर पूर्णरुपमा नष्ट भएको इलाका प्रहरी कार्यालय वेलचौताराका सई काशीराम चौधरीले जानकारी दिनुभयो ।

आगलागीबाट सामान जलेर नष्ट भए पनि मानवीय क्षति भने नभएको उहाँले बताउनुभयो । राति करिब १२ बजेको समयमा प्रहरीमा जानकारी आएपछि तत्काल प्रहरी घटनास्थलमा पुगेको थियो ।

प्रहरी र स्थानीय बासिन्दाले समेत आगो निभाउन नसकेपछि सदरमुकाम दमौलीबाट राति ३ बजे दमकल बोलाएर आगो नियन्त्रणमा लिइएको सई चौधरीले बताउनुभयो ।

दमकल बोलाएपछि दुईवटा कोठामा राखिएका सिरक डसना जोगाउन सकियो, नत्र अझै बढीको क्षति हुने थियो चौधरीले भन्नुभयो । रासस

यो समग्री नेपाल१२३.com मा पुरै पढौं