नौ वर्ष कान्छासँग सुटुक्क बिहे गरिन् उर्मिलाले

मुम्बई । बलिउडमा अहिले उमेरले ४० वर्ष पार गर्न लागेका हिरोईनहरुको विवाहको मौसम सुरु भएको छ । प्रीति जिन्टाले विवाह गरेको एक साता नबित्दै अर्कि नायिका उर्मिला मातोन्डकर पनि विवाह बन्धनमा बाँधिएकी छिन् ।

बुधवार बेलुका उनले आफु भन्दा ९ वर्ष कम उमेरका काश्मिरी ब्यबसायी एवं मोडल मोहसिन अख्तर मीरसँग विवाह गरिन् ।

विवाह कार्यक्रममा उनका नजिकका मित्रहरु मात्रै उपस्थित थिए । ४२ वर्षीय यी नायिकाको विवाहमा एकमात्र बलिउडकर्मी फेशन डिजाइनर मनिष मल्होत्राको उपस्थिती थियो । मनिष मोहसिनका पनि साथी हुन् ।

विवाहपछि उर्मिलाकी साथीले सामाजिक सञ्जालमा तस्बिर पोष्ट गरेकी थिइन् । उर्मिलाले परिवारको आग्रहमा परिवारको सदस्यलाई मात्रै विवाहमा निम्तो गरिएको बताएकी छिन् ।

मोहसिन अख्तर काश्मीरका कपडा ब्यबसायी हुन् । उनले जोया अख्तरको फिल्म ‘लक बाय चान्स’ मा अभिनय गरेका छन् । उनको अर्को फिल्म ‘अ म्यान्स वल्र्ड’ रिलिज हुनै बाँकी रहेको छ ।
३३ वषिर्य मोहसिनले सन २००७ मा मिस्टर इण्डिया प्रतियोगितामा दोस्रो स्थान हाँसिल गरेका थिए । मनिषको केही शोमा मोडलिङ पनि गरेका छन् ।

वाल कलाकार भएर अभिनय सुरु गरेकी उर्मिला कुनै वेला बलिउडको चर्चित नायिकाको रुपमा चिनिन्थिन् । सन १९९१ मा बनेको नरसिम्हामा पहिलो पटक मुख्य भुमिकामा अभिनय गरेकी थिईन् । रामगोपाल बर्मा निर्देशित रंगीला प्रदर्शन भएपछि उनको चर्चा एकाएक बढेको थियो ।

चमत्कार, सत्या, पिन्जर, एक हसिना थी लगायतका फिल्ममा उनले अभिनय गरेकी छिन् ।

यो समग्री नेपाल१२३.com मा पुरै पढौं