२४ फागुन, काठमाडौं । नेपाली कांग्रेसको सभापति चयनका लागि भएको दोस्रो चरणको मतदान सम्पन्न भएको छ । निर्वाचन समितिका अनुसार ३ हजार १२० मत खसेको छ ।
यो पहिलो चरणको भन्दा कम हो । कुल ३ हजार १६१ मतदाता रहेकोमा ३ हजार १४८ मत खसेको थियो । तर, कुनै पनि उम्मेदवारले बहुमत ल्याउन नसकेपछि धेरै मत ल्याउने उम्मेदवारबीच प्रतिस्पर्धा भएको हो ।
निर्वाचन समितिका अनुसार सभापतिको मतगणना आजै हुनेछ । सम्भवत आजै ८ बजेबाट मत गणना हुनेछ ।
बलिउड नायक संजय दत्त जेलबाट छुटेको हप्ता दिन भन्दा बढी भैसकेको छ । संजय दत्त जेलबाट छुटे लगतै उनका नजिकका साथी नायक सलमान खानले पार्टी पनि दिने बताइएको थियो ।
तर, संजयका अनुसार अहिलेसम्म पार्टी त परको कुरा सलमानले उनीसँग भेट पनि गरेका छैनन् । सलमान र संजय एउटै पार्टीमा पुगेपनि भेट नगरेको चर्चा भारतीय मिडियामा चलेको छ ।
सलमानले संजयलाई आरामका लागि आफ्नो फार्म हाउसमा व्यवस्था गर्ने चर्चा पनि चलेको थियो । तर, अहिलेसम्म संजयलाई सलमानले किन भेटेनन् भन्ने कुराले चर्चा पाएको छ ।
जतिबेला संजय जेलबाट बाहिर आएका थिए, उनले सलमान आफू भन्दा पनि ठूलो स्टार बनुन् भनेर कामना गरेका थिए । संजयलाई भेट्न बलिउड नायक साहरुख खानदेखि थुप्रै स्टार उनको घरमा पुगिसकेका छन् । तर, सलमानले अहिलेसम्म किन संजयलाई भेटेनन्, अर्थपूर्ण छ ।
२३ फागुन, काठमाडौं । मोरङ क्षेत्र नम्बर ४ का कांग्रेस नेता राजाराम सरदार शारीरिकरुपमा अशक्त छन् । उनी सबलाङ्ग सरह हिँडडुल गर्न सक्दैनन्, उनलाई ह्वील चियरको आवश्यकता पर्छ । तर, आइतबार महाधिवेशनस्थलमा मतदान गरिरहेका सरदारसँग न हि्वलचेयर थियो, न त कसैले उनलाई सहयोग नै गरिरहेको देखियो ।
कांग्रेसको १३ औं महाधिवेशनमा नयाँ नीति तथा कार्यक्रम तय गर्न र नयाँ नेतृत्व चयन गर्न भन्दै ३८ वर्षीय सरदार पनि अन्य देशभरका नेता कार्यकर्ताहरु जस्तै काठमाडौं आएका हुन् । तर, शारीरिकरुपमा अशक्त भएकाहरुका लागि पार्टीले अपाङ्गमैत्री व्यवहार नगर्दा अकल्पनीय कष्ट व्यहोर्नु परेकोमा सरदार दुःखी छन् ।
कांग्रेसले भोट हाल्ने ठाउँमा मात्रै होइन, पार्टीको केन्द्रीय कार्यसमितिमा पनि अपाङ्गता भएका व्यक्तिहरुका लागि कुनै सीट छुट्याएको छैन । अपाङगता भएका व्यक्तिहरुले कष्ट सहेर भए पनि सवलाङ्गलाई नै मतदान गर्नुपर्ने बाध्यता छ ।
आइतबार मतदानस्थलमा भेटिएका सरदारले अनलाइनखबरसँग भने, ‘बुथमा राखिएको टेबुल पनि अग्लो छ, भोट खसाल्न निकै गाह्रो भयो । देशकै ठूलो, पुरानो र प्रजातान्त्रिक पार्टीले हामीजस्ता अपाङ्गहरुको लागि विशेष व्यवस्था नगरिदिएकोमा दुःख लागेको छ ।’
राष्ट्रिय सभागृहस्थित मत खसाल्ने स्थानमा विहान १० बजेर २७ मिनेटमा पुगे पनि डेढ घण्टापछि फर्किएका उनले आगामी महाधिवेशनमा शारीरिकरुपमा अशक्त भएकाहरुका लागि विशेष व्यवस्था गरिदिन माग गरे । उनले मतदानमा मात्रै होइन, पार्टी नेतृत्वमा पनि आपङ्गता भएका व्यक्तिले आरक्षण पाउनुपर्ने माग गरे ।
आफू बस्ने होटलमा ट्वाइलेट, बाथरुम, खाना खाने स्थानमा राम्रो व्यवस्था भए पनि महाधिवेशनस्थलमा दुःख पाएको उनको गुनासो छ ।
‘पार्टी कार्यालय र महाधिवेशन उदघाटन समारोहमा आउँदा-जाँदा सडकमा भिडभाड हुने भएकाले मारुती भ्यान प्रयोग गरें, त्यसको लागि आफै पैसा तिरें,’ सरदारले भने, ‘आज भोट खसाल्न पनि मारुती भ्यानमै भाडा तिरेर आएँ, यहाँ धेरै दुःख पाइयो ।’
मत खसाल्ने बुथमात्रै होइन, शारीरिकरुपमा अशक्त भएकाहरुका लागि छुट्टै लाइनको व्यवस्थासमेत गरिएको छैन । उनीहरु सबलाङ्गहरुकै लाइनमा कष्टपूर्वक लाइन बस्न बाध्य छन् ।
तस्बिर: श्रीधर पौडेल
२३ फागुन, कुस्मा । पर्वतको कुश्मामा बस र मोटरसाइकल ठोक्किँदा मोटरसाइकल चालकको मृत्यु भएको छ । अर्का एकजना घाइते भएकी छन् ।
दुर्घटनामा ध १ प ३१७९ नम्वरको मोटरसाइकल चालक बागलुङ नगरपालिका-८ का ४० वर्षीय चन्द्रप्रसाद शर्मा पौडेलको मृत्यु भएको हो ।
कुस्माबाट बागलुङका लागि छुटेको ग १ ख ४०९० नम्बरको बस र बागलुङबाट पर्वतका लागि छुटेको मोटरसाइकल कुस्मा नगरपालिका-१ सहस्रघारामा ठोक्किएका थिए ।
मोटरसाइकल चालक पौडेलको घटनास्थलमै मृत्यु भएको जिल्ला प्रहरी कार्यालय बाग्लुङले जनाएको छ ।
दुर्घटनामा बागलुङ नगरपालिका-९ की २६ वर्षीया दुर्गा मल्ल घाइते भएकी छन् । उनलाई उपचारका लागि पोखरा पठाइएको छ ।
बस र बस चालकलाई प्रहरीले नियन्त्रणमा लिएको छ ।
२३ फागुन, काठमाडौं । नेपाली कांग्रेसको १३ औं महाधिवेशन अन्तर्गत नेतृत्व चयनका लागि मतदान चलिरहेको छ । मतदान गर्दै सभापति, पदाधिकारी र केन्द्रीय सदस्यका उम्मेदवारहरुले आफ्नो जित निश्चित रहेको बताएका छन् ।
भुकृटीमण्डपमा जारी मतदानमा सहभागी भएको मतदानमा पहिलो मतदान गरेका सभापतिका उम्मेदवार शेरबहादुर देउवाले आफ्नो जित सुनिश्चित भएको बताए ।
उनीपछि मतदान गरेका अर्का सभापतिका दावेदार कृष्ण सिटौलाले भने जसले जितेपनि कांग्रेसले जित्ने प्रतिक्रिया दिए । उनीसँगै भोट हालेका महामन्त्रीका उम्मेदवार गगन थापाले मुसु मुसु हाँसिरहेका देखिन्थे ।
यस अघि उनले ससुरा अर्जुननरसिंह केसीलाई जिताउन उम्मेदवारी दिएको भन्ने चर्चा चलेपछि हल्लाको खण्डन गर्दै आफूले जीवनको सबैभन्दा ठूलो जोखिम उठाएको बताएका थिए ।
भोट हाल्दै देउवाले भने- मेरो जित सुनिश्चित आफू कसैलाई जिताउन र हराउनका लागि उम्मेदवार बन्ने मुर्ख राजनीतिज्ञ नभएको पनि उनको भनाइ थियो ।
फाल्गुन २२, २०७२- कांग्रेस महाधिवेशनको सर्वाधिक महत्त्वपूर्ण दिन नेतृत्व चयनको लागि आइतबार मतदान हुँदैछ ।
१३ औं महाधिवेशनमा नेतृत्व दौडमा दोस्रो पुस्ताका नेता कार्यवाहक सभापति रामचन्द्र पौडेल, वरिष्ठ नेता शेरबहादुर देउवा र तेस्रो पुस्ताका नेता महामन्त्री कृष्णप्रसाद सिटौला छन् ।
तीमध्ये पौडेल र देउवा कांग्रेसको राजनीतिक इतिहासमा बराबर हैसियतमा मानिन्छन् । उनीहरु पहिलोपटक महाधिवेशनमा आमनेसामने हुँदैछन् ।
नेतृत्वको रस्साकस्सीमा रहेको पौडेल र देउवाको तीब्र प्रतिस्पर्धा मतपत्रमामात्र होइन, सामाजिक सञ्जालमा पनि छ । संयोग नै मान्नुपर्छ, भृकुटीमण्डपमा बन्दसत्र सकिनेवित्तिकै शनिबार साँझ ८ बजे दुवै नेताको ट्विटर फलोअर समान १७९० पुगेको छ ।
पौडेलले २०१४ अगष्ट ५ देखि ट्विटर चलाउन थालेका हुन् भने देउवा महाधिवेशनको मुखमा गत मार्च २३ देखिमात्रै ट्विटरमा देखिएका छन् ।
