रामचन्द्र र कृष्ण सिटौला एकअर्कालाई गलाउने कोसिसमा !

१७ फागुन, काठमाडौं । नेपाली कांग्रेसको १३औं महाधिवेशन सुरु हुन तीन दिन मात्र बाँकी छ । संस्थापन समूहबाट कार्यबाहक सभापति रामचन्द्र पौडेल र महामन्त्री कृष्ण सिटौला र सुजाता कोइरालाले सभापति दाबी गरेका छन् ।

अर्को समूहबाट शेरबहादुर देउवा निर्विकल्प उम्मेदवार देखिएका छन् । तर, सभापतिका आकांक्षीहरुले टीम घोषणा गर्न सकेका छैनन् ।

रामचन्द्र पौडेल र देउवाले १९ गते मात्र टिम घोषणा गर्ने तयारी गरेका छन् भने सिटौला अझै पनि आन्तरिक छलफलमै छन् ।

सोमबार पनि सबै नेताहरु आफ्नो समूहको छलफलमा व्यस्त रहे । संस्थापनका दुई आकांक्षी पौडेल र सिटौला जिल्ला सभापति तथा पूर्व सभापतिहरुलाई प्रयोग गरेर एकअर्कालाई फकाउने वा गलाउने प्रयासमा जुटे । तर, दुबैले न अर्कोलाई गलाउन सकेन र कसैलाई फकाउन नै सके ।

कार्यबाहक सभापति रामचन्द्र पौडेलको पक्षमा जिल्ला सभापतिहरुको भेला गर्ने र नेताहरुलाई भेटेर दबाब दिने टोलीको नेतृत्व काभ्रे सभापति मधु आचार्यले गरिरहेका छन् ।

उनकै पहलमा आइतबार अबेर भृकुटीमण्डलमा भेला भएको छ भने सोमबार पौडेल र शशांक कोइरालालाई भेटेका छन् । भेलामा सहभागी एउटा टोली भने दबाबका लागि सभापति अर्का आकांक्षी कृष्ण सिटौला कहाँ पुगेको थियो । उनीहरुले सिटौलालाई लाई संसदीय दलको नेता वा मनोनित महामन्त्री बन्न आग्रह गरेका छन् ।

‘विचार र एक्सनका हिसावले रामचन्द्र पौडेल सक्षम हुनुहुन्छ’ काभ्रेका जिल्ला सभाति मधु आचार्यले भने, ‘हामीले नेताहरुलाई भेटेर उहाँको नेतृत्वमा चाँडै टिम बनाउन भनेका छौं ।’

महामन्त्री सिटौलाको समर्थनमा पूर्व जिल्ला सभापति र केही वर्तमान सभापतिको टिम सक्रिय छ । जसमा काठमाडौंका भीमसेनदास प्रधान, काभ्रेमा शिव हुमागाईँहरु छन् ।

उनीहरुले संस्थापन पक्षबाटै एउटै उम्मेदवार बनाउने भए कृष्ण सिटौलालाई निर्वाचित महामन्त्रीको उम्मेदवार बनाउनु पर्ने प्रस्ताव छ । ‘रामचन्द्र दाइले सिटौलालाई उधारो पद प्रस्ताव गर्नु भएको छ । तर, उहाँले मान्नु हुन्न’ काठमाडौंका पूर्व सभापति भीमसेनदास प्रधानले भने-‘हामी संस्थापनलाई जिताउन चाहन्छौं । त्यसका लागि सिटौलालाई एकमोडेट गर्नुपर्छ । नत्र रामचन्द्र पौडेल जित्दैनन् ।’

तर, पौडेल शशांकलाई अघि सार्न चाहन्छन् । र, अब सहमति हुने सम्भावना टर्दै गएको छ ।

देउवा चुनावी रणनीति बनाउँदै

वरिष्ठ नेता शेरबहादुर देउवा समूहमा नेता नेता व्यवस्थापन संस्थापनमा भन्दा निकै सहज देखिएको छ । महामन्त्री र कोषध्यक्ष पदमा दाबेदारहरु देखिएपछि देउवालाई सभापति बनाउने मिसनमा प्रतिवद्ध छन् । त्यसैले देउवा अब संस्थापनले टीम घोषणा नगर्दासम्म पर्खने रणनीतिमा छन् । उनको १९ गते मात्र टीम घोषणा हुने सम्भावना रहेको निकटवर्तीहरु बताउँछन् ।

सोमबार देउवा समूहले निर्वाचन व्यवस्थापनबारे छलफल गरे । बानेश्वरस्थित सम्पर्क कार्यालयमा अपराहृन उनको समूहको बैठक बसेको थियो । बैठकमा अहिलेसम्म भएको जनसम्पर्कको समिक्षा हुनुका साथै आगामी रणनीतिबारे छलफल भएको छ ।

यो समग्री नेपाल१२३.com मा पुरै पढौं