विदेशमा बिक्यो ‘प्रेमगीत’, अझै चाहिन्छ लगानी उठाउन ५० लाख

फेसन र मोडलिङ क्षेत्रमा कार्यरत संस्था ‘रनवे फेसन हाउस’ले चलचित्र ‘प्रेमगीत’को ओभरसिज राइट लिएको छ । राजधानीमा शुक्रबार आयोजित पत्रकार सम्मेलनमा चलचित्रका निर्माता सन्तोष सेन र रनवे फेसन हाउसका तर्फबाट अध्यक्ष सुवाससिंह ठकुरी बीच सम्झौता पत्रमा हस्ताक्षर भएको छ ।

फेसन हाउसका अध्यक्ष ठकुरीले चलचित्रलाई सिंगापुर, मलेसिया, थाइल्याण्ड, अष्ट्रेलिया, पोर्चुगल, न्यूजिल्याण्ड, युएई, कतार, बहराइन, ओमान, कोरिया, हङकङ, बेल्जियम, जर्मनी, फ्रान्स, नर्वे, भारत, यूकेमा र आशुसेन फिल्मको व्यवस्थापनमा अमेरिका, हङकङ, यूके, अष्ट्रेलिया, भारत र युरोपको देशहरुमा प्रदर्शन गरिनेछ । चलचित्रको पहिलो ओभरसिज प्रदर्शन सिङ्गापुरबाट शुरु गर्न लागिएको पत्रकार सम्मेलनमा जानकारी दिइयो ।

आशुसेन फिल्मस्का तर्फबाट अध्यक्ष तथा निर्माता सेनले आफ्नो सोचले बनाएको फिल्म सफल भएकोमा खुशी लागेको बताए । ठूलो रकम चलचित्रमा लगानी भएकाले पनि नाफाका लागि ओभरसिज मुख्य श्रोत भएको सेनको भनाई थियो । उनले चलचित्रको लगानी डेढ करोडमाथि रहेको दाबी गरे ।

जसमध्ये नेपालबाट ८० लाख बढी रकम आफूलाई आउने उनको भनाई थियो । करिब ३० लाखमा रनवेले ओभरसिज राइट्स किनेको वुझिएको छ । यसअर्थमा यो चलचित्रलाई लगानी उठाउन अझै ५० लाख हारहारीको व्यापार आवश्यक छ । यसका लागि आशुसेन फिल्मस्ले ओभरसिजलाई मुख्य श्रोत मानेको छ । सुदर्शन थापा निर्देशित यो चलचित्रमा प्रदिप खड्का र पूजा शर्मा मुख्य भूमिकामा छन् ।

यो समग्री नेपाल१२३.com मा पुरै पढौं