यी हुन् चीनले नेपालमा गर्ने १० काम

११ चैत, काठमाडौं । प्रधानमन्त्री केपी शर्मा ओलीको चीन भ्रमणका क्रममा तत्कालै इन्धन आयात गर्ने सम्झौता नभए पनि दीर्घकालीन फाइदा पुग्ने केही महत्वपूर्ण विषयमा सम्झौताहरु भएका छन् । यी सम्झौता कार्यान्वयन भएको खण्डमा अबको एक दशकमा नेपालको पहाडी क्षेत्रमा निकै ठूलो आर्थिक विकास हुन सक्छ ।

नेपालका प्रधानमन्त्रीको चीन भ्रमणमा ठूलो उपलिब्ध भनेको पोखरा अन्तराष्ट्रिय विमानस्थलको ऋण सम्झौता हो । साथै रेल्वेसम्बन्धी जुन सहमति भएको छ, यसले दीर्घकालमा नेपालको विकासमा धेरै ठूलो अर्थ राख्छ । व्यापार तथा पारवहन सम्झौताको महत्व पनि दीर्घकालीनरुपमा निकै ठूलो छ ।

चीनले नेपालसँग व्यापार विस्तारका लागि यातायात सेवा जोड्न सिगात्से-रसुवागढी-काठमाडौं-पोखरा-लुम्बिनीसम्म रेल्वेको सम्भाव्यता अध्ययन गरी विस्तृत परियोजना प्रतिवेदन (डीपीआर) गर्ने सम्झौता भएको छ ।

विजय गच्छदार उपप्रधान तथा भौतिक पूर्वाधार मन्त्री भएलगतै उनले चिनियाँ कम्पनीलाई रेल्वेको पूर्वसम्भाव्यता अध्ययन गर्ने जिम्मा दिएका थिए । पूर्वसम्भाव्यता अध्ययनका क्रममा रेल्वे सेवा सञ्चालन गर्न सकिने सञ्भाव्यता देखिएकाले विस्तृत परियोजना प्रतिवेदन तयार पार्ने जिम्मा पनि चिनियाँ कम्पनीलाई नै दिइएको छ ।

त्यसैगरी, केरुङ-रसुवागढी-हेटौडा १३२ केभी क्षमताको अन्तरदेशीय प्रशारणलाइन निर्माणमा आर्थिक तथा प्राविधिक सहयोग गर्ने सझौता भएको छ । अन्तरदेशीय प्रसारणलाइन निर्माण भएसँगै दुई देश बीच विद्युत व्यापारका लागि ढोका खुलेको छ ।

त्यसैगरी, चीनले काठमाडौं-तातोपानी (अरनिको) राजमार्ग मर्मत गर्ने भएको छ । गत बैशाखमा गएको भूकम्पले प्रभावित बनाएको यो राजमार्ग मर्मत भएसँगै तातोपानी नाकाबाट हुने व्यापार बढ्ने भएको छ । भूकम्पपछि तातोपानी नाका ठप्प भएको थियो । दुई देशको संयुक्त वक्तव्यमा आवश्यकता अनुसार नाकाहरु खोल्दै जाने उल्लेख छ ।

त्यसैगरी, भूकम्प पीडितहरुका लागि ३ बिलियन आरएमबी अर्थात करिब ५० अर्ब रुपैयाँ सहयोग गर्ने भएको छ । त्यस्तै, नेपालमा पेट्रोल र ग्यासको उत्खनन बारे चीनले संभाव्यता अध्ययन गरिदिने भएको छ ।

पछिल्लो समय केरुङ नाकाबाट नेपालसँगको व्यापार बढाउन चाहेको चीनले स्याफ्रुबेसी-रसुवागढी सडक मर्मत गरिदिने भएको छ । त्यसैगरी हुम्लाको हिल्सामा पुल निर्माण गर्ने, ३२ हजार घरधुरीलाई सोलार जडान गरिदिने, काठमाडौंको चक्रपथको स्तरोन्नित गर्ने, काठमाडौं-खाँदबारी-धनकुटा सडकलाई डबल लेनको बनाउने भएको छ ।

पोखरा विमानस्थल निर्माणका लागि चीनले अनुदान तथा सस्तो व्याजदरमा ऋण सहयोग गर्ने सम्झौता भएको छ । यो सहयोगले नेपालमा अब दोस्रो अन्तरराष्ट्रिय विमानस्थलको खाँचो पूर्ति हुने सम्भावना बढेको छ ।

साभारः अनलाईन खबर

यो समग्री नेपाल१२३.com मा पुरै पढौं