​जन्मेको गाउँको नामलाई ब्राण्ड बनाएर व्यापार गर्दै कतारमा एक नेपाली

महेश्वर नेपाल/उज्यालो ।

कतार, वैशाख २६ – कतारमा व्यवसाय गर्दै आएका एक नेपालीले आफू जन्मेको गाउँको नामलाई ब्राण्ड नेम बनाए व्यवसाय गर्न थालेका छन् ।

गएको पाँच वर्षदेखि कतारमा व्यवसाय गर्दै आएका धनुषाका अव्दुल वासिदले आफू जन्मेको गाउँको नामलाई ब्राण्ड नेम बनाएर इलेक्ट्रोनिक्स सामानको व्यवसाय सुरु गर्नुभएको हो ।

उहाँले आफ्नो जन्मगाउँ धनुषाको बेलाकोलाई व्यावसायीक ब्राण्ड नेम बनाउनुभएको हो । उहाँले ‘बेलाको’ ब्राण्ड बनाएर एयर कण्डिसन, कुलर तथा पङ्खाको व्यवसाय गर्नुभएको हो ।

वासिदले आफ्नो कम्पनी अब्दुल हाफिज ट्रेडिङ मार्फत ग्रिसमा बनेका ती सामान कतार भित्र्याउनु भएको हो । कतार अन्तर्राष्ट्रिय बजार भएकाले छुट्टै ब्राण्ड बनाएर बजारमा लैजाने काम चुनौतीपूर्ण रहेको वासिदले बताउनुभयो ।

उहाँले भन्नुभयो ‘अन्तर्राष्ट्रिय बजारमा ब्राण्ड बनाउन सफल भएका अन्य कम्पनीसँग प्रतिस्पर्धा गरेर नयाँ ब्राण्ड बजारमा लैजान गाह्रो छ । तर मैले यसलाई चुनौतीका रुपमा लिएको छु ।’

नेपाली भएकै कारणले कतारमा व्यवसाय गर्न विगतमा अप्ठेरो परेको अनुभव पनि उहाँसँग छ । कतारले सन् २०२२ मा विश्वकप आयोजना गर्ने तयारी गरेसँगै व्यापार व्यवसायका लागि प्रशस्तै अवसर रहेको उहाँले बताउनुभयो ।

‘कतारले अहिले विकास निर्माणमा पैसा र समय खर्चेको छ । त्यसैले यहाँ कमाएको सिप र पैसालाई व्यापारमा लगानी गर्न सके राम्रो हुन्छ ।’ वासिदले नेपाल र युएईमा समेत शाखा बिस्तार गर्ने योजना पनि बनाउनुभएको छ ।

from Nepal123.com - ​जन्मेको गाउँको नामलाई ब्राण्ड बनाएर व्यापार गर्दै कतारमा एक नेपाली