बाहिर आयो कांग्रेस र एमाओवादी हुन नसकेको ७ बुँदे सम्झौता (एक-एक बुँदासहित)

काठमाडौं, २६ वैशाख । नयाँ सरकार बनाउन प्रतिपक्षी दल नेपाली कांग्रेस र एमाओवादीबीच सम्झौताका लागि तयार पारिएको ७ बुँदे ड्राफ्ट सार्वजनिक भएको छ ।

एमाले नेतृत्वको वर्तमान सरकार परिवर्तन गरेर प्रचण्डको नेतृत्वमा नयाँ सरकार बनाउने एमाओवादी निर्णयलगत्तै यी दुबै दलबीच सम्झौताको सम्पूर्ण तयारी पूरा भइसकेको थियो । तर, अन्तिममा बाह्य दबाब थेग्न नसकेर एमाओवादी अध्यक्ष पुष्पकमल दाहाल प्रचण्डले कांग्रेस सभापति शेरबहादुर देउवालाई आफ्नो निवास लाजिम्पाटमा बोलाएर सरकार परिवर्तनको निर्णयबाट आफू ब्याक भएको जानकारी गराए ।

सम्झौताको ड्राफ्ट बोकेर तयार पार्ने नेताहरु पनि सँगसँगै लाजिम्पाट पुगेका थिए । तर, प्रचण्ड पछि हटेपछि सम्झौता भएन् ।

के-के थियो ७ बुँदे सम्झौतामा ? (हेर्नुस् एक–एक बुँदा)

१. नेपालको संविधानबारे देशभित्र मधेसी, आदिवासी जनजाति, दलितलगायत पक्षले देखाएको असन्तुष्टिलाई सम्बोधन गर्न सबै राजनीतिक दलहरुको सहमतिका आधारमा संविधानमा आवश्यक संशोधनको वातावरण बनाउने।

२. नेपालको संविधानले प्रत्याभूत गरेको संघीय लोकतान्त्रिक गणतन्त्रात्मक शासन व्यवस्थाको ऐतिहासिक उपलब्धीको रक्षा गर्दै संविधान बमोजिम आवश्यक कानुनी व्यवस्था गर्ने।

३. सक्रमणकालीन न्यायको विषय सम्बोधन गर्न गठित सत्य निरुपण तथा मेलमिलाप आयोग र बेपत्तामा छानविन आयोगसँग सम्बन्धित कानुनमा आवश्यक संशोधन गरी समाजमा शान्ति, मेलमिलापको स्थिति बनाउन आयोगहरुलाई प्रभावकारी रुपमा काम गर्ने वातावरण बनाउने। सशस्त्र संघर्षको क्रममा मारिएका मृतकका परिवार, बेपत्ता व्यक्तिका परिवार, अंगभंग र द्धन्द्धका क्रममा विस्तापित परिवारले पाउनुपर्ने क्षतिपूर्ति रकम उपलब्ध गराउने। सशस्त्र संघर्षको अवधिमा भएका जग्गा विवाद सहमतिका आधारमा समाधान गर्ने।

४. वि.सं. २०७२ साल वैशाख १२ र २९ गएको भूकम्पबाट भएको क्षतिको विवरण लिई भूकम्पपीडितको राहत तथा पुन:स्थापनाका लागि पुनर्निर्माण कार्यलाई राष्ट्रिय अभियानका रुपमा अगाडि बढाउने।

५. देशमा शान्ति सुरक्षा र सुशासनको प्रत्याभूति गर्दै कालोबजारी, कृत्रिम अभाव, महंगीको अवस्था अन्त्य गरी दैनिक उपभोगका सामाग्रीको सहज उपलब्धीको व्यवस्था गर्ने।

६. नेपालको संविधानले परिकल्पना गरे बमोजिम देशमा शान्ति, स्थिरता र सुशासनको प्रत्याभूति गर्दै आर्थिक समृद्धि तथा विकासका अभियान संचालन गर्ने।

७. नेपाली कांग्रेस र एमाओवादीको संयुक्त सरकार गठन गर्ने। दुबै दलको सहमतिमा संसदमा रहेका अन्य दललाई सरकारमा सहभागी गराउने। एमाओवादी अध्यक्ष पुष्पकमल दाहाल प्रचण्डको नेतृत्वमा नयाँ सरकार गठन गर्ने। …महिनापछि वि.सं. … साल … महिना … गतेदेखि संघीय संसदको निर्वाचनसम्म कांग्रेस सभापति शेरबहादुर देउवा प्रधानमन्त्री हुने।

हस्ताक्षर                                           हस्ताक्षर

शेरबहादुर देउवा                               प्रचण्ड

from Nepal123.com - बाहिर आयो कांग्रेस र एमाओवादी हुन नसकेको ७ बुँदे सम्झौता (एक-एक बुँदासहित)