मुस्ताङमा सडकलाई पाँच करोड रुपैयाँ बजेट माग

४ चैत, मुस्ताङ। हिमाली जिल्ला मुस्ताङमा सबैभन्दा बढी सडकका योजना माग भएको छ । २४औँ जिल्ला परिषद्माफत २२ वटा सडक आयोजना निर्माणका लागि पाँच करोड ९९ हजार रुपैयाँ बजेट प्रस्ताव गरिएको छ ।

सोह्र गाविस रहेको जिल्लाका सबै गाविस कार्यालयसम्म सडक सञ्जालको पहुँ विस्तार भएपनि मर्मतसम्भार र कालोपत्रका लागि उक्त सङ्ख्यामा सडक आयोजनाको माग भएको पाइएको छ । जिल्लामा प्राप्त सडक योजनालाई विभिन्न कार्यक्रमअन्तर्गत समावेश गरेर सम्बोधन गर्ने प्रयास गरिएको स्थानीय विकास अधिकारी हरिप्रसाद बाँस्तोलाले जानकारी दिए ।

उनका  अनुसार ग्रामीण पुनर्निर्माण तथा पुनस्र्थापना कार्यक्रमअन्तर्गत पाँच, स्थानीय यातायात पूर्वाधार क्षेत्रगत कार्यक्रममा आठ र सडक बोर्डमार्फत आठवटा सडक मर्मतसम्भार र विस्तारको कार्य हुनेछ । जिल्लाको गौरवका रुपमा मनाङ जिल्ला जोड्ने सडकलाई समेत प्राथामिकता साथ बजेट विनियोजन गरिएको छ ।

उक्त सडकका लागि ८० लाख रुपैयाँ विनियोजन गरिएको जिविसले जनाएको छ । सबैभन्दा बढी ग्रामीण पुनर्निर्माण तथा पुनस्र्थापना कार्यक्रममा रु तीन करोड ४९ लाख, सडक बोर्डअन्तर्गत रु २८ लाख र स्थानीय यातायात पूर्वाधारमा रु ७५ लाख बजेट माग गरिएको छ ।

जिल्लामा पर्ने कालीगण्डकी करिडोरअन्तर्गत जोमसोम–कोरला सडकखण्डको क्षेत्रमा पनि सडक विभागले आफैँले लगानी गरेर काम गर्न अर्थ मन्त्रालयमा बजेट माग गरिसकेको छ । कोरला नाका सञ्चालनका लागि सडकको स्तरोन्नति पहिलो प्राथामिकता भएकाले सडक विभागले उक्त खण्डलाई प्राथामिकतामा राखेको स्थानीय विकास अधिकारी बाँस्तोलाले जानकारी दिए ।

रासस

यो समग्री नेपाल१२३.com मा पुरै पढौं