दक्ष शिक्षकको मापदण्ड तयार, सञ्चार प्रविधिको ज्ञान अनिवार्य

४ चैत, काठमाडौं । तपाईं शिक्षक हुनुहुन्छ र सञ्चार प्रविधिबारे ज्ञान छैन भने अयोग्य ठहरिन सक्नुहुन्छ । त्यसैले अब शिक्षकहरु पनि सञ्चार प्रविधिमा दक्ष हुनुपर्ने भएको छ ।

शैक्षिक जनशक्ति विकास केन्द्रले सफल शिक्षकमा हुनुपर्ने बिभिन्न ८ दक्षतासहितको प्रारुप तयार पारेको छ । त्यसलाई शिक्षामन्त्री गिरिराजमणि पोखरेलको अध्यक्षतामा बसेको शैक्षिक जनशक्ति विकास परिषदको बैठकले पारित गरेको छ ।

यस्ता छन् मापदण्ड

विषय बस्तुको ज्ञान, शिक्षण सिकाइका तौरतरिका सम्बन्धी ज्ञान, विद्यार्थीहरुको पृष्ठभूमि, सन्चार तथा सहकार्य, सिकाई वातावरण र कक्षा व्यवस्थापन शिक्षकका न्यूनतम मापदण्ड हुन् ।

यसैगरी निरन्तर सिकाइ र पेशागत विकास, कानुनी आधार तथा पेशागत आचार संहिता, सूचना तथा सञ्चार प्रविधिलगायतको ज्ञान पनि शिक्षकका मापदण्डको रुपमा राखिएको छ । ‘सञ्चार प्रविधिको ज्ञानलगायतका यी मापदण्ड न्यूनतम रुपमा पूरा गरेमा मात्रै एउटा शिक्षक प्रफेक्ट हुन्छ,’ शैक्षिक जनशक्ति विकास केन्द्रका कार्यकारी निर्देशक सूर्यप्रसाद गौतमले अनलाइनखबरसँग भने, ‘अन्यथा शिक्षकको वृत्ती विकासमा बाधा पुग्छ ।’

परिषद शैक्षिक जनशक्तिको मापदण्ड तथा नीति निर्धारण गर्ने उच्चस्तरीय निकाय हो । आठ न्यूनतम मापदण्डका आधारलाई केन्द्रित गरी शिक्षकहरुलाई आगामी वर्षदेखि तालिम दिइनेछ भने तालिम पछि आफू सफल भएको पुष्टि गर्न शिक्षकहरुले लिखित परीक्षा दिनुपर्नेछ ।

स्रोत केन्द्रमा तालिम नहुने

पाँच वर्षको अबधिभित्र शिक्षकहरुलाई दक्ष बनाउन ३० दिनको तालिम दिइने छ र त्यो तालिम १५-१५ दिनको हुनेछ । विगतमा ३० दिनलाई १०-१० दिनमा बिभाजन गरी तीन मोडेलमा तालिम दिने गरिएको थियो ।

अबदेखि स्रोत केन्द्रहरुमा शिक्षकको तालिम हुनेछैन । देशभर १ हजार ५३ वटा स्रोत केन्द्र छन् । ति स्रोत केन्द्रहरुमा दक्ष जनशक्ति नभएका गुनासो आउने गरेको थियो ।

अबदेखि २९ वटा शैक्षिक तालिम केन्द्रमा शिक्षकहरुलाई तालिम दिइनेछ र तालिम केन्द्र नभएका स्थानमा अगुवा स्रोतकेन्द्रमा तालिमको व्यवस्था मिलाइने छ ।

शिक्षकहरुलाई डिभिजनको प्रमाणपत्र

तालिमलाई शिक्षकहरुले आ-आफ्ना विद्यालयलाई व्यवहारमा उतार्नुपर्नेछ । त्यसबारे प्रोजेक्ट वर्क तयार पारेर केन्द्रमा पठाउनु पर्नेछ । ति सबैलाई एक सय पूर्णांक मानेर मूल्याकंन गरी शिक्षकहरुलाई पहिलो, दोस्रो र तेस्रो डिभिजनको प्रमाणपत्र दिइनेछ ।

‘प्रोजेक्ट वर्क, फेस टु फेस काउन्सीलिङलगायतका तालिमको आधारमा एक्सन प्लान बनाएर स्कूलमा न्युनतम ४५ दिन काम गर्नुपर्छ,’ केन्द्रका कार्यकारी निर्देशक गौतमले भने, ‘त्यसक्रममा आएका समस्या, सफलतालगायतका विषय समेटेर रिपोर्ट बनाइ तालिम केन्द्रमा पठाउनुपर्छ । अनि हामीले डिभिजन खुलाएर प्रमाणपत्र दिन्छौं ।’

परिषदबाट स्वीकृत मापदण्ड पूरा गरे दक्ष शिक्षक नहुँदा शैक्षिक गुणस्तर खस्किएको भन्ने गुनासो हट्ने उनले विश्वास व्यक्त गरे ।

यो समग्री नेपाल१२३.com मा पुरै पढौं