​नेपाली निजी क्षेत्रले चिनियाँ व्यवसायीलाई भने – नेपालमा संयुक्त लगानी गरौं

बेइजिङ : निजी क्षेत्रका तीन नेपाली संस्थाका अध्यक्षहरुले चिनियाँ व्यवसायीलाई लगानी लिएर नेपाल आग्रह गरेका छन्।

वेइजिङमा चाइना काउन्सिल फर द काउन्सिल अफ इन्टरनेशनल ट्रेड (सिसिपिआइटी) मा व्यवसायीहरुलाई सम्बोधन गर्दै नेपाल उद्योग बाणिज्य महासंघका अध्यक्ष पशुपति मुरारका, नेपाल उद्योग परिसंघका अध्यक्ष हरिभक्त शर्मा र नेपाल चेम्बर अफ कमर्सका अध्यक्ष राजेशकाजी श्रेष्ठले नेपालमा लगानी गर्न आह्वान गरेका हुन्।

‘चीनले लिएको वान वेल्ट वान रोड नीतिलाई हामीले उच्च स्वागत गरेका छौं र अब त्यसको हिस्सेदारी लिन हामी उद्यत पनि छौं’ नेपाल उद्योग वाणिज्य महासंघका अध्यक्ष मुरारकाले भने। नेपालमा संविधान निर्माणपछि लगानीको वातावरणमा सुधार आएको उल्लेख गर्दै पर्यटन जलविद्युत लगायतका क्षेत्रमा चिनियाँ लगानीलाई उनले आमन्त्रण गरे।

परिसंघ अध्यक्ष शर्माले संयुक्त लगानीमा आएका उद्योगले नेपालमा उच्च सफलता हासिल गरेको उदाहरण दिँदै सोही अवधारणामा आधारित व्यवसायका लागि चिनियाँ पक्षलाई आग्रह गरे। ‘२० बर्षअघि एक मिलियन अमेरिकी डलरमा खुलेका संयुक्त लगानीका उद्योगको बजार पुँजीकरण मात्र अहिले एक बिलियन अमेरिकी डलर पुगेको छ त्यसैले संयुक्त लगानीको व्यवसायका लागि नेपाल सदैव उन्नत मुलुक हो’ उनले भने।

संविधान निर्माणपछि वातावरण अझ सुदृढ भएको भन्दै उनले नेपालको लगानी भोलीको लागि सुन्दर भविष्‍य रहेको बताए।

नेपाल चेम्बर अफ कमर्स एवं नेपाल चीन चेम्बर अफ कमर्सका अध्यक्ष श्रेष्ठले चीनसँगको आफुहरुको सदियौं पुरानो सम्बन्ध अब नयाँ चरणमा प्रवेश गरेको बताए। दुई देशीय व्यापारिक सम्बन्धमा पनि अब सुनौला घाम उदाउने संभावना देखिएको उनको भनाइ छ।

कार्यक्रमलाई प्रधानमन्त्री केपी शर्मा ओलीले पनि सम्बोधन गरेका थिए। उनले नेपाल अब नयाँ चरणमा प्रवेश गरेको र लगानीकर्ताको सहजताका लागि प्रशासनिक व्यवधानहरु पनि धेरै हद सम्म कम गरिएको बताए। संविधान निर्माणपछि मुलुकको प्राथमिकतामा आर्थिक विकास परेको र त्यसका लागि नेपाल सरकार हदैसम्म प्रतिबद्ध रहेको उनको भनाइ छ।

नेपालमा चिनियाँ पर्यटकको आगमन वृद्धि एवं पर्यटन क्षेत्रमा चिनियाँ लगानीका लागि उनले आग्रह गरे। वर्षमा करिव पाँच लाख नेपाली युवा श्रम बजारमा आउने उल्लेख गर्दै प्रधानमन्त्री ओलीले जुनसुकै उद्योग विस्तारका लागि पनि श्रम शक्तिको खाँचो नहुने बताए।

लगानी बोर्डका प्रमुख कार्यकारी अधिकृत राधेश पन्तले नेपालीमा लगानी सम्भावना बारे पावर पोइन्ट प्रेजेन्टेसन दिएका थिए। उनले नेपालमा आर्थिक प्रशासनिक र राजनीतिक सबै हिसावले अब गरिने लगानीबाट राम्रो प्रतिफल आउने चिनियाँ व्यवसायीहरुलाई बताए।

प्रधानमन्त्रीकै उपस्थितीमा सिसिपिआइटी र नेपाल चाइना चेम्बर अफ कमर्सबीच सहयोग आदान प्रदानबारे सम्झौता भएको छ। सम्झौतामा सिसिपिआइटीका उपाध्यक्ष यिन जोङहुवा र चेम्बर अध्यक्ष श्रेष्ठले हस्ताक्षर गरेका छन्। कार्यक्रमलाई सम्बोधन गर्दै यिनले आगामी दिनमा लगानीका लागि नेपाल आफुहरुको रोजाइ मुलुक रहने बताए।

समाचार सौजन्यः पहिलो पोष्ट

यो समग्री नेपाल१२३.com मा पुरै पढौं