अर्काको छोरा अपहरण गर्ने महिला वीरगन्जबाट पक्राउ, भारतीय गाडी जफत

वीरगन्ज, २२ चैत । बालकको अपहरणमा संलग्न रहेको आरोपमा प्रहरीले गएराति एक महिलालाई पक्राउ गरी आवश्यक अनुसन्धान सुरु गरेको छ ।

पक्राउ पर्नेमा पोखरिया नगरपालिका सतबरियाकी सुगन्धी देवी रहेकी छिन् । पोखरिया नगरपालिका सतबरियाकै ९ वर्षीय बालक लोटन चौहानको अपहरणमा प्रत्यक्ष संलग्न रहेको आरोपमा सुगन्धीलाई पक्राउ गरेको इलाका प्रहरी कार्यालय पोखरियाका प्रहरी निरीक्षक यमबहादुर गुरुङले बताउनुभयो ।

गत फागुन १५ गते पोखरिया बजार घुमाउन भनी लिएर गएको लोटनलाई सुगन्धीले सीमावर्ती भारतीय बजार सिक्टामा पुर्याई दुईजना अपहरणकारीको जिम्मा लगाएकी थिइन् ।

सीमावर्ती भारतीय प्रहरी सिक्टाको सहयोगमा अपहरण भएको २४ दिनपछि यही चैत ९ गते सिक्टास्थित रेल्वे स्टेसनको नजिकबाट लोटनलाई नेपाल प्रहरीले सकुशल उद्धार गरेका थिए । उद्धार गरिएका बालकको बयानका आधारमा प्रहरीले सुगन्धीलाई पक्राउ गरिएको प्रहरी निरीक्षक गुरुङले बताउनुभयो ।

यसैगरी सशस्त्र प्रहरी बल सुरक्षा बेस क्याम्प भिखमपुरको सुरक्षा गस्ती टोलीले भारतीय नम्बर भएको चारीको एउटा बलेरो जिप मसिहानीबाट आफ्नो नियन्त्रणमा लिएको छ । पर्साको मसिहानी चोकमा आइतबार बिहान चेकजाँचका क्रममा प्रहरीलाई देखेर जिपका चालक भागेपछि अनुसन्धान गर्ने क्रममा प्रहरीले उक्त जिप चोरीको भएको प्रमाण फेला पारेको थियो ।

एमपिएसएचओ ५ एफ १२०५ उल्लिखित महिन्द्रा कम्पनीको उक्त बलेरो जिपको ब्लुबुक र इन्जिनमा भएको नम्बर फरक देखिएपछि उक्त गाडी चोरीको भएको आशङ्कामा नियन्त्रणमा लिइएको सशस्त्र प्रहरी बल सुरक्षा बेस क्याम्प भिखमपुरले जनाएको छ । रासस

यो समग्री नेपाल१२३.com मा पुरै पढौं