पानामा पेपरको नेपाल कनेक्सनः मोसाक फोन्सेकाको ‘नेपाल भेन्चर्स’ रहस्यमय

२२ चैत, काठमाडौं । विश्वमा सबैभन्दा गोप्य रुपमा काम गर्ने कम्पनी मध्येको एक हो पानामाको मोसाक फोन्सेका । त्यही कम्पनीको एक करोड १० लाख गोप्य दस्तावेज सार्वजनिक भएको छ र यसले रुसी राष्ट्रपति भ्लादिमिर पुटिनसहित धेरै ठूलो नेताको पोल खोलेको छ ।

र, फोन्सेकाको नेपाल कनेक्सनको खोजी सुरु भएको छ । नहोस् पनि किन ५० देशका १४० राजनीतिक समेत मुछिएका छन् । जसमा धेरै चर्चित अनुहार छन् । पानामा पेपरका अनुसार रुसी राष्ट्रपति पुटिनका सहयोगीले करोडौं डलर कमाएको देखिएको छ ।

मोसाकको लिक भएका दस्तावेजहरुलाई नै पानामा पेपर भनिएको हो ।

जर्मनीमा रहेको सुडडोइचे चाइटुङले हात पारेको दस्तावेजहरुलाई अन्तराष्ट्रिय खोज पत्रकार समूह (आईसीआईजे) ले संसारका सञ्चार माध्यमहरुलाई वितरण गरेको थियो । जुन आज विहान बीबीसी, गार्जियन, इण्डियन एक्सप्रेस लगायतका सञ्चार माध्यममा एकसाथ प्रकाशित भएका छन् ।

यसले फोन्सेकाले कसरी आफ्नो ग्राहकको कालोधनलाईर् बैध बनाउँछ र ‘अफसोर’ कम्पनी खोल्छ भन्ने देखाउँछ ।

‘नेपाल भेन्चर्स’ फोन्सेकाको भएको दाबी

पेरुको एक टीभी कार्यक्रम ‘पानारोमा’ले दाबी गरे अनुसार बि्रटिस भर्जिन आइल्याण्डमा रहेको ‘नेपाल भेन्चर्स’ नामक कम्पनी छ ।

यो कम्पनी मोसाक फोन्सेकाले नै खडा गरेको टीभी कार्यालयको दाबी छ । ‘नेपाल भेन्चर्स’ले पेरुमा एनटाल्सिस नामक निर्माण कम्पनीविरुद्ध परेको मुद्धामा एनटाल्सिसको पैरबी गरिरहेको छ । र, एनटाल्सिसमा नेपाल भेन्चर्सको १५ प्रतिशत शेयर रहेको दाबी गरिएको छ ।

एनटाल्सिस भ्रष्टाचारको मुद्दा खेपिरहेका मार्टिन बेलानउन्द लोसिओको कम्पनीको हो र उनको कनेक्सन पेरुका निवर्तमान राष्ट्रपति उमालासँग रहेको ठानिएको छ ।

जुलाई २०१० मा स्थापना भएको नेपाल भन्चर्स नामक कम्पनीको कानूनी प्रतिनिधिका रुपमा पेरुकी ३० वर्षीया रोजालिम दिया बेन्देजु छिन् । उनले नै एनटाल्सिसको मुद्दा हेर्दै आएकी छन् ।

बि्रटिस भर्जिन आइल्याण्ड संसारको ‘ट्याक्स हेभन’ मध्ये एक मानिन्छ । ‘ट्याक्स हेभन’ भनिएको देशहरुमा करपोरेट कर एकदमै कम हुन्छ र त्यहाँबाट विश्वभर ब्यापार विस्तार गर्न सकिन्छ ।

मोजाक फोन्सेकाले यस्तो काम गर्न विश्वका धनी र शक्तिशाली मानिसहरुलाई सहयोग गर्ने गरेको छ । र, ‘नेपाल भेन्चर्स’ त्यस्तै कम्पनी मध्ये एक भएको दाबी गरिएको छ ।

ब्रिटिस भर्जिन आइल्याण्ड पछिल्लो समय नेपालमा लगानी प्रतिवद्धता जनाउने मुलुकको सूचीमा तेस्रो स्थानमा छ । विशेष गरी लगानीकर्ताको आकर्षण पर्यटन क्षेेत्र देखिएको छ ।

तर, मोसाक फोन्सेकाले आफ्नो कम्पनीको नाम किन नेपाल भेन्चर्स राख्यो भन्ने खुलेको छैन ।

यो समग्री नेपाल१२३.com मा पुरै पढौं