आमाको उजुरीबाट समातिए टासी गुरुङ

रमेश धमला

२२ चैत, काठमाडौं । नेपाल प्रहरीको केन्द्रीय अनुसन्धान ब्युरो (सिआइबी)ले विभिन्न पुराना तर अनुसन्धान हुन नसकेका घटनाहरुको सूची तयार पारेर राखेको छ । त्यहि सूचीमा थियो ०५२ सालमा ठमेलमा भएको इटालियन नागरिक डेभिड क्यारारो हत्या काण्ड पनि ।

हत्या भएको केहि वर्षसम्म त डेभिडको परिवारले नेपाल प्रहरीसँग सोधिरहेका थिए हत्यारा कहिले पक्राउ पर्छ भनेर । तर वर्षौंसम्म पनि हत्याका आरोपी पक्राउ नपरेपछि डेभिडको परिवारले पनि सोध्न छाड्यो । यता प्रहरीले पनि फाइल लगभग बन्द नै गर्‍यो ।

तर केहि महिना अघि मात्रै २० वर्ष पुरानो डेभिड हत्या काण्डको फाइल पल्टायो सिआइबीले । किनकी इटालियन नागरिकलाई छुरी हानेर हत्या गर्ने टासी गुरुङ सण्डुप घले बनेर नेपालमै लुक्दै आएको सुराक सिआइबीलाई मिलेको थियो ।

आमाको उजुरी

टासीको विरुद्ध केहि महिना अघि उनकै सानीआमाले काठमाडौं परिसरमा उजुरी गरेकी थिइन् । जस्मा सण्डुप नाम बताउँदै लुकिरहेका टासीको विस्तृत विवरण खुलाइएको थियो । सिआइबी स्रोतका अनुसार सानी आमाले काठमाडौं परिसरमा दिएको उजुरीमा इटालियन नागरिकको हत्या टासी गुरुङले गरेको र ऊ अहिले सण्डुप घले भन्दै हिंडिरहेको भनेर उल्लेख थियो । तर काठमाडौं परिसरले त्यतातिर खासै ध्यान भने दिएन ।

यता सिआइबीले इटालियन नागरिकको हत्यामा संलग्न व्यक्ति पनि टासी नै भएको भन्दै खोजी गरिरहेको थियो । सिआइबीका इन्सपेक्टर रुगम कुँवर नेतृत्वमा खटिएको अनुसन्धान टोलीले इटालियन नागरिकको हत्यामा संलग्न टासी उर्फ सण्डुप घले नाममा नेपालमै बस्दै आएको सूचना पायो ।

त्यहि सूचनाको आधारमा करीब ३ हप्तादेखि टासी सिआइबीको निगरानीमा थिए र अन्ततः २० वर्ष पछि इन्स्पेक्टर कुँवरको टोलीले उनलाई पक्राउ गर्न सफल भयो ।

जुवा र मदिराको लतपछि नेपाल फिर्ता

हत्या काण्डपछि टासी नक्कली कागजात बनाएर अमेरिका भागेको प्रहरी स्रोत बताउँछ । करिब १५ वर्षको अमेरिका बसाइपछि उनले पीआरसमेत बनाइसकेका थिए तर अमेरिका बसाईं उनलाई फापेन ।

जुवा र रक्सिको लतमा नराम्रोसँग उनी फसिसकेका थिए । जुवाको कारण भएका पैसा पनि सकिएपछि उनले सुरुमा श्रीमतीलाई नेपाल पठाए र त्यसको केहि महिना पछि आफू पनि अमेरिका छोडेर नेपाल फर्किन बाध्य भए ।

३ वर्ष अगाडि नेपाल फर्किएका टासीले ०७१ सालमा श्रीमती माथि पेट्रोल छर्किएर आगो लगाउने प्रयास गरेका थिए । त्यसको आरोपमा उनी पक्राउ पनि परे । तर, उनी टासी नभइ सण्डुप नामले चिनिए र प्रहरीको आँखामा छारो हाल्दै उम्किन सफल भए ।

श्रीमतीसँग उनको सम्बन्ध बिगि्रँदै गएको थियो । मदिरा र जुवातासको लतले सम्पत्ति गुमाउँदै गएका उनले अन्ततः जीबन संगिनीसँगको सामिप्यता पनि गुमाए । जसका कारण उनी पछिल्लो समय ठमेलको कोर्टीयाडमा बस्दै आएका थिए ।

घटनाको अन्तर्राष्ट्रिय प्रभाव

०५२ सालमा जब इटालियन नागरिक डेभिडको हत्या भएको समाचार संसारभर फैलियो । नेपालमा आफनो नागरिकको हत्या भएपछि इटाली सरकारले समेत नेपाल नजान भनेको थियो । यसको असर यतिसम्म पर्‍यो कि घटना भएको वर्ष इटालीबाट जम्मा तीन जना मात्रै पर्यटक नेपाल आएको सिआइबी बताउँछ ।

सिआइबीका प्रमुख डिआइजी नवराज सिलवाल भन्छन्, ‘डेभिडको प्रेमिका रुँदै इटाली पुगेपछि घटना निकै सनसनीपूर्ण बन्यो तर २० वर्षपछि भए पनि घटनाका मुख्य आरोपी कार्वाहीको दायरामा आएको छ ।’

२० वर्ष पछि टासी पक्राउ पर्नु अपराध गर्नेहरु जतिसुकै टाढा पुगे पनि कानुनको नजरबाट जोगिन सक्तैनन् भन्ने गतिलो उदाहरण भएको डिआइजी सिलवालको दावी छ ।

कसरी भएको थियो डेभिडको हत्या ?

०५२ साल असोज ६ गते नेपाल घुम्न आएका ति इटालियन नागरिक डेभिड क्यारारो आफ्ना दुई महिला साथीसँगै ठमेलस्थित रेगी पवमा पुगेका थिए । अनुसन्धान अधिकृत इन्स्पेक्टर रुगम कुँवरका अनुसार पवमा डेभिड स्नूकर खेलिरहेका थिए । उनका महिला साथीहरु वियर पिउँदै थिए ।

त्यहिबेला टासी गुरुङसहित ५ जनाको टोली पनि पवमा पुग्यो । उनीहरुले वियर पिएर बसिरहेका डेभिडका साथीहरुलाई जिस्क्याउन थाले । त्यतिकैमा टासीको समूह र डेभिडबीच विवाद सुरु भयो । रक्सिले मातेको टासीको समूह डेभिड माथि स्नूकरको लठ्ठी र चक्कुले प्रहार गरी हत्या गरेर फरार भयो ।

यो समग्री नेपाल१२३.com मा पुरै पढौं