प्रहरी थकाई मारेर नबस्नेः आईजीपी अर्याल

डडेलधुरा, २२ चैत । प्रहरी महानिरीक्षक उपेन्द्रकान्त अर्यालले राष्ट्र र नागरिकको सेवा गर्दै मुलुकमा शान्ति सुरक्षा कायम गर्न तथा सफल अपराध अनुसन्धानको लागि नेपाल प्रहरी सदैव जुटिरहने बताउनुभएको छ ।

जिल्ला प्रहरी कार्यालय डडेलधुरामा सोमबार जिल्लास्थित नागरिक समाज, राजनीतिक दल, संचारकर्मी, महिला सञ्जाल, महिला अधिकारकर्मी, उद्योगी व्यवसायी, पर्यटन व्यवसायी तथा पूर्व प्रहरी कर्मचारीहरुसँग भएको परिचयात्मक तथा अन्तरक्रिया कार्यक्रममा प्रहरी महानिरीक्षक अर्यालले यस्तो बताउनुभएको हो ।

अपराध अनुसन्धान तत्काल सफल नभए पनि प्रहरी थकाई मारेर नबस्ने तथा अनुसन्धानको बिट पनि नमार्ने उल्लेख गर्दै उहाँले प्रहरी कार्यमा सफलता हासिल गर्नका लागि सदैव जुटिरहने बताउनुभयो । यसैको कारण राजधानीलगायत देशभर भएका ठूला अपराधहरुको वर्षौपछि पनि सफल अनुसन्धान गर्न प्रहरी सफल रहेको स्मरण गराउनुभयो ।

कार्यक्रममा सहभागीहरुको जिज्ञासा निरुपण गर्दै प्रहरी महानिरीक्षक अर्यालले संघीयतामा नेपाल प्रहरीको संरचनाबारे गृहकार्य भइरहेको जानकारी गराउँदै विभिन्न स्थानमा थप प्रहरी इकाई स्थापना र प्रहरी जनशक्ति थप लगायतका विषयमा आवश्यक छलफल गरी निक्र्यौल गरिने बताउनुभयो ।

साथै प्रहरी महानिरीक्षक अर्यालले आजै जिल्लास्थित सुरक्षा निकायका प्रमुखहरुसँग समेत अन्तरक्रिया गर्नुभएको थियो । कार्यक्रममा जिल्लाको समग्र शान्ति सुरक्षाको व्यवस्था र चुनौतिका बारेमा छलफल तथा अन्तरक्रिया भएको थियो ।

साथै प्रहरी महानिरीक्षक अर्यालले जिल्ला प्रहरी कार्यालय डडेलधुराको निरीक्षण गर्नुको साथै कार्यरत प्रहरी अधिकृत तथा जवानहरुलाई समसामयिक बिषयमा आवश्यक निर्देशन दिनुभएको छ ।

सो क्रममा उहाँले प्रहरी व्यक्ति भन्दा संगठन भनेर चिनिने भएकोले प्रहरी कर्मचारीले सदैव त्रुटीरहित तरीकाले मन भित्रैदेखि सेवाको भावना राखी राज्यले दिएको जिम्मेवारी पुरा गर्न निर्देशन दिनुभयो ।

सरुवा, पदोन्नती र राष्ट्रसंघीय मिसनमा खटाउने कार्य लगायतका बृत्तिबिकासका कुरामा पारदर्शिता अपनाइएको, इमानदारिताको कदर गरी गुनासो सुन्ने वातावरणको व्यवस्था गरिएकोले प्रहरी कर्मचारीहरुले उच्च मनोबलका साथ काम गर्नुपर्ने उहाँले बताउनुभयो ।

यो समग्री नेपाल१२३.com मा पुरै पढौं