डाक्टर शशांक कोइरालाले अर्जुननरसिंहलाई सोधे, ‘दाइको त ढाड दुख्ने समस्या छ हैन?’

काठमाडौं : नेपाली कांग्रेसको १३ औं महाधिवेशनमा महामन्त्रीका प्रत्यासीद्वय अर्जुननरसिंह केसी र डा शशांक कोइराला मतदानस्थल नजिकै सँगै देखिए। कार्यकर्ताको आग्रहपछि उनीहरुले सँगै फोटो पनि खिचाए। कोइराला प्यानलमा रहेका यी दुवै अहिले एकै पदमा दुई खेमाका प्रतिस्पर्धी हुन्। केसी यसपटक पुरानो कित्ता छाडेर देउवा पक्षका महामन्त्री उम्मदवार हुन्।
फोटो खिच्ने क्रममा एक कार्यकर्ताले भने, ‘मलाई मन पर्ने दुवै नेता एकै ठाउँमा पर्नुभयो। के गर्ने गर्ने तनाब भा’छ,’ जवाफमा केसी र कोइराला दुवैले मुस्कुराए मात्र। भोट कसैले पनि माग्ने आँट गरेनन्।

त्यसपछि केसीले कोइरालातर्फ हेर्दै भने, ‘गलिँदो रहेछ। हिँड्दा हिँड्दा थाकिने रहेछ।’

केसीले त्यति भनेपछि शशांकले केसीको ढाडमा हात राख्दै भने, ‘दाइको त ढाडमा पनि समस्या छ क्यारे!’

डाक्टर कोइराला आँखाका विशेषज्ञ हुन्।

त्यसपछि दुवै नेता फेरि मत माग्न ब्यस्त रहे।

एकै म्यानमा नअटाएका दुई तरबार

राजनीतिमा अर्जुननरसिंह केसीभन्दा डाक्टर शशांक कोइराला नयाँ हुन्। नेपाली कांग्रेसको राजनीति, पञ्चायत प्रवेश र पञ्चायतकालीन मन्त्री तथा प्रजातन्त्र पुनर्स्थापनापछि फेरि कांग्रेसमै आएका अर्जुननरसिंह केसी कोइराला परिवारसँग लामो समय जोडिएका पात्र हुन्। अर्जुननरसिंह केसी संस्थापन पक्षका नेता शशांकसँगमात्रै भिडिरहेका छैनन् यसपालाको चुनावमा। उनका अर्का प्रतिस्पर्धी हुन् आफ्नै ज्वाइँ गगन थापा। नुवाकोटबाट पटक पटक सांसद रहँदै आएका अर्जुननरसिंह केसी संस्थापन कांग्रेसतर्फ बलियो हस्ती रहँदै आएका थिए। अघिल्लो महाधिवेशनमा सबैभन्दा धेरै मत ल्याएर केन्द्रीय सदस्य हुनेको सूचीमा उनी अग्रस्थानमै थिए। तर उनी कोइराला क्याम्पबाट राजनीतिक उपलब्धि हासिल नहुने देखेपछि शेरबहादुर देउवा प्यानलतिर जोडिएका हुन्।

यता शशांक लामो चिकित्सकीय प्रोफेसनपछिमात्रै सक्रिय राजनीतिमा छिरेका हुन्। वीपी कोइरालाका कान्छा छोरा डाक्टर शशांकलाई राजनीतिको यो उचाईमा पुग्न अर्जुननरसिंह केसीहरुले जस्तो संघर्ष गर्नै परेन। सोझै उनी राजनीतिको केन्द्रमा पुगे। सभापति रहँदै सुशील कोइरालाको निधन भएपछि कोइराला परिवारको केन्द्रमा उनी एकाएक उदाउन पुगे। सुशील कोइरालाको निधन शशांककै घरमा भएको थियो। कोइराला परिवारबाट राजनीति गर्ने शेखर र सुजातालाई उछिन्दै शशांक यसपाला महामन्त्री पदका उम्मेदवार बने। संस्थापन क्याम्पबाट सभापति उम्मेदवार बनेका रामचन्द्र पौडेल सुशील कोइरालाको निधनपछि सधैजसो शशांकको घरमा भेटिन्थे भने कांग्रेसको पदाधिकारी बैठक पनि शशांककै घरमा हुन थालेको थियो।

यो समग्री नेपाल१२३.com मा पुरै पढौं